कोरोनाबाट विदेशमा मात्र तीन सय १९ जना नेपालीको निधन

बीरगञ्ज ।
कोरोना भाइरसको संक्रमणबाट हालसम्म विदेशमा मात्र तीन सय १९ जना नेपालीले ज्यान गुमाएका छन् । गैरआवासीय नेपाली संघअन्तर्गतको स्वास्थ्य समितिका अनुसार विदेशका विभिन्न २० देशमा बसोबास गर्दै आइरहेको नेपालीहरूको कोरोनाका कारण ज्यान गएको हो ।

पछिल्लो सातामा थप २ जना नेपालीको निधन भएको गैरआवासीय नेपाली संघले जनाएको छ । संघका अनुसार पछिल्लो साता यूकेमा एक जना र साउथ अफ्रिकामा एक जनाको निधन भएको हो । संघको स्वास्थ्य समितिका संयोजक सन्जिव सापकोटाका अनुसार शनिबार साँझसम्म विभिन्न ५० देशमा रहेका ५४ हजार पाँच सय ९१ जना नेपालीमा कोरोना संक्रमण देखिएको छ तीमध्ये ५२ हजार नौ सय ४५ जना कोरोनामुक्त भएका छन् । यो कुल संक्रमितको ९५ प्रतिशत हो ।

समितिका अनुसार यो साता बेलायत, जापान, साउथ अफ्रिकालगायत मध्यपूर्वमा रहेका थप नेपालीहरूमा कोरोना संक्रमण देखिएको छ । यस्तै संघले ब्रिटेन र दक्षिण अफ्रिकामा देखापरेको कोरोना भाइरसको नयाँ स्वरूप (कोरोना भाइरस भेरियन्ट)विरूद्ध अहिले बजारमा आएका खोपहरू प्रयोग गर्न सकिने जनाएको छ । स्वास्थ्य समितिका संयोजक सापकोटाका अनुसार पछिल्लो छोटो अनुसन्धानले फाइजर र बायोएन्टेकलगायतका भ्याक्सिन नयाँ प्रकृतिको कोरोना भाइरसको विरूद्धमा प्रभावकारी हुने देखाएको हो ।

आत्महत्या रोकथामसम्बन्धी विशेष भर्चुअल कार्यशाला
यस्तै वैदेशिक रोजगारीमा रहेका नेपालीमा मनोरोग बढ्न थालेपछि संघअन्तर्गतको वैदेशिक रोजगार र कल्याण विभागले आत्महत्या रोकथामसम्बन्धी विशेष भर्चुअल कार्यशाला आयोजना गरेको छ । विभागका अनुसार हालसम्म तीन कार्याशाला सम्पन्न भइसकेको छ । सो कार्यशालामा मनरोग विशेषज्ञ डा. विजय ज्ञवाली र डा. रञ्जन थापाले सहभागीहरूलाई प्रशिक्षण दिएका थिए । विशेषतः मध्यपूर्व, मलेसियालगायत मुलुकका नेपालीले सहभागिता जनाएका थिए ।