झण्डै आठ हजार जनाद्वारा सगरमाथाको आरोहण

सोलुखुम्बु । विश्वको सर्वाेच्च शिखर सगरमाथामा आरोहण सुरु भएदेखि हालसम्म नेपालतर्फबाट झण्डै आठ हजार व्यक्तिले आरोहण गरेका छन् । सन् १९५३ मे २९ मा पहिलोपटक मानव पाइला पुगेको दिनदेखि हालसम्म सात हजार आठ सय ५१ जनाले शिखर चुमेको पर्यटन विभागको तथ्यांक छ ।

विभागका सूचना अधिकारी सूर्यप्रसाद उपाध्यायका अनुसार सन् २०२२ सम्ममा सात हजार दुई सय ५१ जनाले आरोहण गरेका छन् भने सन् २०२३ को चालु सिजनमा करिब छ सय जनाले आरोहण गरेका छन् । यस्तै, सगरमाथामा कतिले ज्यान गुमाए भन्ने यकिन तथ्यांक भने कुनै पनि सरकारी निकायसँग नभएको विभागले जनाएको छ । विभिन्न एजेन्सीहरूसँगको समन्वयमा यसको तथ्यांक संकलन भइरहेको विभागका सूचना अधिकारी उपाध्यायले बताए । ७० वर्षमा झण्डै तीन सय जनाले सगरमाथामा ज्यान गुमाएको एजेन्सीहरूको तथ्यांक छ । यस सिजनमा मात्रै १३ जना आरोहीले सगरमाथा क्षेत्रमा ज्यान गुमाएका छन् । नेपालका पाँच जना, मलेसियाका दुई जना, चीन, भारत, अमेरिका, सिङ्गापुर, मालदोवा र अस्टे«लियाका १÷१ जना छन् । तीमध्ये १० वटा शव उद्दार भइसकेको छ भने तीनवटा शव उद्दार हुन बाँकी रहेको पर्यटन विभागले जनाएको छ ।

नेपालले २९ मेलाई अन्तर्राष्ट्रिय सगरमाथा दिवसको रूपमा मनाउँदै आएको छ । विश्वको सर्वाेच्च शिखर सगरमाथामा पहिलोपटक मानव पाइला पुगेको दिनलाई नेपालले दिवसको रूपमा मनाउने गरेको हो । २९ मे १९५३ मा न्युजिल्यान्डका सर एडमन्ड हिलारी र नेपालका तेन्जिङ नोर्गे शेर्पाले सगरमाथाको सफल आरोहण गरेका थिए । नेपालले त्यही दिन (२९ मे) लाई सन् २००७ देखि अन्तर्राष्ट्रिय सगरमाथा दिवसको रूपमा मनाउन सुरु गरेको हो । अहिले सगरमाथाको उचाइ थप ८६ सेन्टिमिटरले अग्लिएको छ । नेपाल र चीनले संयुक्तरूपमा गरेको सर्वेक्षणपछि सगरमाथाको उचाइ आठ हजार आठ सय ४८ दशमलव ८६ मिटर पुगेको हो । सगरमाथाको नयाँ उचाइपछि पनि आरोहीहरूले नियमित आरोहण गरिरहेका छन् ।