निर्जीवन बीमा कम्पनीका साढे ११ लाख बीमालेख जारी

काठमाडौं । निर्जीवन बीमा कम्पनीहरुले चालू आर्थिक वर्षको मंसिर मसान्तसम्म कुल १५ अर्ब ७२ करोड १० लाख १५ हजार रुपैयाँ बीमाशुल्क आर्जन गरेका छन् । नेपाल बीमा प्राधिकरणका अनुसार १४ निर्जीवन बीमा कम्पनीहरुले ११ लाख ६१ हजार दुई सय ५९ वटा बीमालेख बिक्री गरी सो रकम संकलन गरेका हुन् । बीमा कम्पनीहरुले आर्जन गरेको बीमाशुल्क गत आर्थिक वर्षको सोही अवधिको तुलनामा २५ करोड ७४ लाख रुपैयाँले कम हो । गतवर्ष मंसिर मसान्तसम्म निर्जीवन बीमा कम्पनीहरुले १५ अर्ब ९७ करोड रुपैयाँ बीमाशुल्क आर्जन गरेका थिए ।

चालू आर्थिक वर्षको मंसिर महिनामा मात्रै निर्जीवन बीमा कम्पनीहरुले दुई अर्ब ९९ करोड छ लाख चार हजार रुपैयाँ बीमाशुल्क आर्जन गरेका छन् । यस्तै बिक्री भएको बीमालेख संख्या भने दुई लाख ७२ हजार तीन सय ८५ छ । गत मंसिर मसान्तसम्म नेपाल इन्स्योरेन्स कम्पनीले ७२ हजार दुई सय १९ वटा बीमालेखा बिक्री गरी ६१ करोड ९१ लाख ९० हजार रुपैयाँ बीमाशुल्क आर्जन गरेको छ । यसपछि दि ओरियन्टल इन्स्योरेन्स कम्पनीले १७ हजार ९८ वटा बीमालेख बिक्री गरी ७२ करोड ७१ लाख २५ हजार रुपैयाँ बीमाशुल्क आर्जन गरेको छ ।

राष्ट्रिय बीमा कम्पनीले पनि चालू आर्थिक वर्षको मंसिर मसान्तसम्म ६६ हजार छ सय ६४ वटा बीमालेख जारी गरी ६१ करोड ६१ लाख ५१ हजार रुपैयाँ बीमाशुल्क आर्जन गरेको छ । नेसनल इन्स्योरेन्स कम्पनीले १४ हजार नौ सय २३ वटा बीमालेख जारी गरी ५१ करोड १९ लाख ७४ हजार रुपैयाँ बीमाशुल्क आर्जन गरेको छ । नेको इन्स्योरेन्सले पनि मंसिर मसान्तसम्म एक लाख २८ हजार छ सय ४२ वटा बीमालेख जारी गरी एक अर्ब ३३ करोड ३९ लाख छ हजार रुपैयाँ बीमाशुल्क आर्जन गरेको छ । यसैगरी प्रभु इन्स्योरेन्स कम्पनीले ४७ हजार दुई सय ४९ वटा बीमालेख जारी गरी ८४ करोड १४ लाख १६ हजार रुपैयाँ बीमाशुल्क आर्जन गरेको छ । शिखर इन्स्योरेन्स कम्पनीले एक लाख २२ हजार छ सय ७८ वटा बीमालेख जारी गरी एक अर्ब ५७ करोड ७६ लाख ५३ हजार रुपैयाँ बीमाशुल्क आर्जन गरेको छ ।

एनएलजी इन्स्योरेन्स कम्पनीले ८२ हजार आठ सय ९८ वटा बीमालेख जारी गरी एक अर्ब एक करोड ६४ लाख ३९ हजार रुपैयाँ बीमाशुल्क आर्जन गरेको छ । हिमालयन एभरेष्ट इन्स्योरेन्स कम्पनीले एक लाख एक हजार दुई सय ३३ वटा बीमालेख जारी गरी एक अर्ब ३९ करोड ५३ लाख ८५ हजार रुपैयाँ बीमाशुल्क आर्जन गरेको छ । सानिमा जीआईसी इन्स्योरेन्स कम्पनीले पनि चालू आर्थिक वर्षको मंसिर मसान्तसम्म ६३ हजार दुई सय ४९ बीमालेख जारी गरी ९६ करोड ८६ लाख १० हजार रुपैयाँ बीमाशुल्क आर्जन गरेको छ । सिद्धार्थ प्रिमियर इन्स्योरेन्स कम्पनीले पनि एक लाख २८ हजार तीन सय ८९ वटा बीमालेख जारी गरी एक अर्ब ६५ करोड १९ लाख १९ हजार रुपैयाँ बीमाशुल्क आर्जन गरेको छ ।

सगरमाथा लुुम्बिनी इन्स्योरेन्स कम्पनीले पनि चालू आर्थिक वर्षको मंसिर मसान्तसम्म एक लाख २२ हजार छ सय ९३ वटा बीमालेख जारी गरी एक अर्ब ९९ करोड ९७ लाख एक हजार रुपैयाँबीमाशुल्क आर्जन गरेको छ । आईजीआई प्रुडेन्सियल इन्स्योरेन्स कम्पनीले ९९ हजार सात सय ५९ वटा बीमालेख जारी गरी एक अर्ब ३८ करोड १२ लाख आठ हजार रुपैयाँ बीमाशुल्क आर्जन गरेको छ । यस अवधिमा युनाइटेड अजोड इन्स्योरेन्स कम्पनीले ८७ हजार छ सय ५६ वटा बीमालेख जारी गरी एक अर्ब सात करोड १२ लाख ३८ हजार रुपैयाँ बीमाशुल्क आर्जन गरेको प्राधिकरणले जनाएको छ ।

प्राधिकरणद्वारा आईजीआई प्रुडेन्सियल, युनाइटेड अजोड र राष्ट्रिय बीमा कम्पनीलाई कारबाही
बीमा कम्पनीहरुको नियमनकारी निकाय नेपाल बीमा प्राधिकरणले तीनवटा बीमा कम्पनीलाई कारबाही गरेको छ । प्राधिकरणका अनुसार यही पुस ६ गते बसेको प्राधिकरण सञ्चालक समितिको बैठकको निर्णयअनुसार तीनवटा निर्जीवन बीमा कम्पनीलाई कारबाहीस्वरुप नगद जरिबाना लगाइएको हो ।

कारबाहीमा पर्नेहरुमा आईजीआई प्रुडेन्सियल इन्स्योरेन्स कम्पनी लिमिटेड, युनाइटेड अजोड इन्स्योरेन्स कम्पनी र राष्ट्रिय बीमा कम्पनी रहेका छन् । प्राधिकरणका अनुसार ती कम्पनीलाई प्रतिकम्पनी दुई लाख रुपैयाँको दरमा नगद जरिबाना गरिएको हो । स्थलगत निरीक्षणका क्रममा यथेष्ट मात्रामा कैफियत फेला परेपछि स्पष्टीकरण सोधिएको र चित्तबुझ्दो स्पष्टीकरण प्राप्त नभएपछि नगद जरिबाना गरिएको प्राधिकरणको भनाइ छ ।

प्राधिकरणका अनुसार निरीक्षणका क्रममा अधिकांश बीमा कम्पनीहरूले उधारो बीमा गराएको, रेट कटिङ गरेको, सम्पत्ति शुद्धीकरणमा ध्यान नदिएको, दाबी भुक्तानीमा बीमितलाई दुःख दिएको लगायतका कैफियतहरु देखिएको र सोही कैफियतका आधारमा कारबाही गरिएको प्राधिकरणको भनाइ छ ।