आईएमई लाइफको साधारण सेयर नेप्सेमा सूचीकृत

काठमाडौं । आईएमई लाइफ इन्स्योरेन्स कम्पनी लिमिटेड (नेप्से सिम्बोल आईएलआई) र नेपाल स्टक एक्सचेञ्ज लिमिटेडबीच कम्पनीको प्रतिसेयरअंकित तथा चुक्ता मूल्य एक सय रुपैयाँ कायम भएको चार करोड कित्ता साधारण सेयर सूचीकरण गर्ने सम्झौता सम्पन्न भएको छ । कम्पनीले सर्वसाधारण समक्ष सिभिल क्यापिटल मार्केट लिमिटेड (धितोपत्र निष्काशन तथा बिक्री प्रबन्धक)मार्फत साधारण सेयरको खुल्ला बिक्री आह्वान गरेको थियो ।

कम्पनीले सर्वसाधारण (वैदेशिक रोजगारीमा रहेका नेपाली, सामूहिक लगानी कोष र कर्मचारीहरू समेत) ३० प्रतिशत अर्थात् एक करोड २० लाख कित्ता सेयरवितरण गरेको र कम्पनीका संस्थापक सेयरधनीहरूको ७० प्रतिशत अर्थात् दुई करोड ८० लाख कित्ता समेत गरी चार करोड कित्ता साधारण सेयरधितोपत्र सूचीकरण विनियमावली, २०७५ बमोजिम मिति २०८०/०४/१७ गतेको नेपाल स्टक एक्सचेञ्ज लिमिटेडको निर्णयानुसार स्टक एक्सचेन्जमा सूचीकरण भएको छ । बिहीबार कम्पनी र नेपाल स्टक एक्सचेन्जबीच धितोपत्र सूचीकरण सम्झौता सम्पन्न भएको हुँदा सम्झौता सम्पन्न भएको दोस्रो दिनबाट धितोपत्रको कारोबार सुरु हुनुपर्ने भए पनि सो दिन शुक्रबार र तत्पश्चात् शनिबार पर्ने भएकाले सम्भवतः अर्काे साता अर्थात् आइतबारबाट कारोबार सुरु हुने बताइएको छ ।

कम्पनीको प्रधान कार्यालय काठमाडौं जिल्ला, लैनचौरमा रहेको र सूचीकरणपश्चात् दिनुपर्ने सेयर रजिस्ट्रारसम्बन्धी सम्पूर्ण सेवा ग्लोबल आईएमई क्यापिटल लिमिटेड नक्सालबाट हुनेछ ।