सरकारी कार्यालयका आर्थिक प्रशासन शाखा प्रमुखलाई करसम्बन्धी तालिम

काठमाडौं । करदाता सेवा कार्यालय गल्छीले धादिङका सरकारी कार्यालयका आर्थिक प्रशासन शाखा प्रमुखहरूलाई करसम्बन्धी तालिम प्रदान गरेको छ । कार्यालयले जिल्लामा रहेका संघ, प्रदेश र स्थानीय तहका सम्पूर्ण सरकारी कार्यालयका आर्थिक प्रशासन शाखा प्रमुखहरूलाई टीडीएस तथा ईटीडीएस प्रविष्ठीसम्बन्धी तालिम सञ्चालन गरेको हो ।

कार्यक्रममा सरकारी कार्यालयका ३५ जना आर्थिक शाखा प्रमुख सहभागी भएका थिए । सो कार्यक्रममा कर कार्यालय गल्छीकी कार्यालय प्रमुख शिखा वाग्लेले सरकारी निकायका अग्रीम कर प्रविष्ठीमा हुन सक्ने त्रुटि न्यूनीकरण तथा कर कानुनको पालना, कर्मचारीमा करसम्बन्धी सचेतनामा हरेक सरकारी निकाय र सोका आर्थिक शाखाको भूमिका सहयोगी हुने हुँदा यो तालिमले आगामी दिनमा अपेक्षित कर संकलन, कर छली नियन्त्रणमा सहयोगी हुने अपेक्षा लिएको बताएकी थिइन् । कोष तथा लेखा नियन्त्रण कार्यालय धादिङका प्रमुख रेशमकुमार खत्रीले आगामी दिनमा करदाता सेवा कार्यालयले कर संकलनमा अझ बढी क्रियाशील हुने अपेक्षा राखेको बताए । यस्तै, आगामी दिनमा कर कार्यालय गल्छी र कोलेनिकाबीच वित्तीय सुशासन कायम गर्न सहकार्य हुने बताए ।

तालिम कार्यक्रममा प्रशिक्षक हरिकुमार श्रेष्ठले करको कानुनी व्यवस्था र टीडीएस तथा ईटीडीएस प्रक्रियाबारे प्रस्तुति दिएका थिए । तालिममा सहभागी प्रशिक्षार्थीले कार्यालयमा सो सम्बन्धमा आएका समस्याको सम्बन्धमा जिज्ञासा राखेका थिए । उनीहरूले राखेको जिज्ञासाको कर अधिकृत शिखा वाग्ले, नासु प्रेमकुमार श्रेष्ठ र प्रशिक्षक हरि श्रेष्ठले समाधान गर्ने कोसिस गरेका थिए । साथै, कर कार्यालय गल्छीले आगामी दिनमा विभिन्न सरोकारवाला निकाय, व्यवसायी, कर प्रदायक, सार्वजनिक निकाय र नागरिकसँग यस्तै किसिमका कर शिक्षा कार्यक्रम सञ्चालन गर्ने कार्यालय प्रमुख वाग्लेले प्रतिबद्धता समेत जनाएकी थिइन् ।