छठ पर्वसंगै डोम समुदायलाई बाँसका सामग्री बनाउन भ्याइ नभ्याइ

जलेश्वर । छठ पर्व आउन चार दिन बाँकी रहँदा डोम समुदायमा डालो, नाङ्लो र टालु टपरी बनाउन व्यस्त रहेका उनीहरुमा अहिले उल्लास छाएको छ ।

छठ पर्वमा विभिन्न परिकार पकाएर खाने गरेको सोही ठाउँ बस्ने ६० वर्षीया मालती डोमिनले बताइन् । जीवनका हरेक दुःख विर्सेर मिठो मसिनो खाने र राम्रो लगाउने पर्व छठ आउँदा आफूहरुलाई खुसी लागेको मनरासिस्वा नगरपालिकाका ५० वर्षीय बिजु डोमले बताए । कात्तिक लाग्ने वित्तिकै बिहानदेखि बेलुकासम्म डालो, नाङ्लो र टालुटपरी बनाउनमा तल्लीन रहने र यी वस्तु बजारमा बेच्दा मनग्य आम्दानी हुने गौशाला नगरपालिकाकी ५५ वर्षीया केवली डोमिनले बताइन् ।

छठपर्व मनाउनेले छठमाता तथा सूर्यदेवलाई बाँस र बेतकै चोयाबाटै बनाइएका डालो, नाङ्लो र टालुटपरीमा अर्घ दिनुपर्ने भएकाले प्रत्येक परिवारमा पाँच÷सात बाँसबाट बनेका सामग्री आवश्यक पर्ने जनाइएको छ । सम्सी गाउँपालिकाका ६० वर्षीय बुधो डोमले छठ पर्वका लागि बाँस सामग्रीका सामानहरुबनाउने गरेको बताए ।

डालो, नाङ्लो र टालुटपरी बेचेर वर्षभरिकै लागि खर्च जोहो गर्ने गरेको जलेश्वर नगरपालिकाका रामजी डोमले बताए । त्यसैगरी जिल्लाको भङ्गहा नगरपालिकाका सिरिया डोमले घरका बालकदेखि बुढासम्मले डालो नाङ्लो बेचेर प्रतिव्यक्ति ४० देखि ५० हजार र प्रत्येक परिवारले दुई र तीन लाखको हाराहारीमा आम्दानी गर्ने गरेको बताए ।

दिनदिनै छठपर्व मनाउने व्यक्तिको सङ्ख्यामा वृद्धि हुँदै जाँदा प्रत्येक व्यक्तिलाई बाँसको भाँडाकुडा पुर्याउन डोम जातिलाई सकस भएको छ । अहिले जिल्लाको प्रत्येक पालिकाको गाउँ गाउँमा डोम जातिका प्रत्येक घरमा बाँस र बेतको थुप्रो राखिएको छ भने परिवारका सबैले बाँस र बेतका चोयाबाट सामग्री बनाउन व्यस्त देखिन्छन् ।