सालनालसहितको बच्चा झाडीमा भेटियो

काठमाडौँ । सालनालसहितको नवजात शिशु हेटौँडाको हुप्राचौरको एक झाडीमा फेला परेको छ । स्थानीयले बच्चा रोएको आवास सुनेपछि प्रहरीलाई खबर गरेका थिए । प्रहरीले उद्धार गरी अस्पताल पुर्याएको नवजात शिशुलाई मानवसेवा आश्रमले संरक्षणमा लिएर उपचार गराइरहेको छ । झाडीमा सालनाल सहितको बच्चा यत्तिकै फालिदिँदा शिशुको खुट्टा र हातमा सामान्य घाउ लागेको छ ।

मानवसेवा आश्रम मकवानपुरकी संयोजक ईशा थापाले हेटौँडा अस्पतालमा उपचाररत शिशुको अवस्था सामान्य रहेको बताइन् । झाडीमा ल्याएर बच्चा कसले फालेको हो हालसम्म खुल्न सकेको छैन । यस सम्बन्धमा अनुसन्धमान चलिरहेको जिल्ला प्रहरी कार्यालय मकवानपुरका प्रहरी उपरीक्षक रुद्र पराजुलीले बताए ।

बेसहारा, अशक्त, असहाय, अनाथ, अभिभावकविहीन, मानसिक तथा शारीरिकरुपमा कमजोर सडक आश्रित मानवको उद्धार, पारिवारिक पुनर्मिलनदेखि उनीहरुसँगै दसैँ, तिहार, छठजस्ता पर्व मनाउने गरी ‘यस वर्षको चाडपर्वमा कसैले बस्नु पर्दैन सडकमा’ भन्ने मूल नाराका साथ मानव सेवा आश्रम र आनी छोइङ डोल्मा फाउण्डेसनले गत असोज २७ गतेदेखि यही मङ्सिर ४ गतेसम्म विशेष अभियान सञ्चालन गरेको छ ।

मानव सेवा आश्रम केन्द्रीय अध्यक्ष रामजी अधिकारीले पूर्व–पश्चिम राजमार्गसँग जोडिएका ४६ जिल्ला तथा बागमती र गण्डकी प्रदेशका केही जिल्लालाई लक्षित गरी सो अभियान सञ्चालन गरिएको जानकारी दिए । उनका अनुसार यस क्रममा हालसम्म विभिन्न उमेर समूहका २९२ जनाको उद्धार गरिसकिएको छ ।