विमानस्थलबाट १ किलो ३०० ग्राम सुन सहित श्रीलंकन महिला पक्राउ

काठमाडौँ । एक किलो तीन सय ग्राम अवैध सुनसहित एकजना महिलालाई प्रहरीले त्रिभुवन अन्तर्राष्ट्रिय विमानस्थलबाट पक्राउ गरेको छ ।

पक्राउ पर्नेमा गएराति १ बजे फ्लाइ दुबईको उडान नम्बर एफजेड ५७३ बाट काठमाडौँ आएकी ५४ वर्षीया श्रीलङ्काली नागरिक कान्थी माथी कावस्कर रहेको त्रिभुवन अन्तर्राष्ट्रिय विमानस्थलका सुरक्षा प्रमुख तथा प्रहरी नायब महानिरीक्षक अर्जुन चन्दले जानकारी दिए ।

चन्दका अनुसार राहदानी नम्बर ८१५१३८५ भएकी निज महिलाले लगाएको ब्राभित्र प्लाष्टिकले बेरेको अर्धठोस सुन दुई पोका तौल पाँच सय ग्राम तथा लगाएको कट्टुभित्र आठ सय ग्राम सुन गरी कुल एक किलो तीन सय ग्राम सुन बरामद गरिएको हो । प्रहरीले उक्त विषयमा थप अनुसन्धान भइरहेको जनाएको छ ।