पूर्व–पश्चिम र मेट्रो रेलमा रूसको चासो

काठमाडौं ।
रुसले पूर्व–पश्चिम विद्युतीय रेलमार्ग र राजधानी काठमाडौँमा निर्माण गर्ने भनिएको ‘मेट्रो प्रोजेक्ट’मा लगानी गर्न इच्छुक रहेको बताएको छ । केही महिनाअगाडि नेपालस्थित रुसी राजदूतले ती परियोजनामा रुस लगानी गर्न इच्छुक रहेको बताएका थिए ।

रुसी राजदूतकै आग्रहअनुसार भौतिक मन्त्रालयले प्रस्ताव तयार पारेर परराष्ट्र हुँदै काठमाडौंस्थित रुसी राजदूतावासमा पठाएको थियो । लोमा समयसम्म रुसबाट उक्त प्रस्तावको बारेमा कुनै खबर नआइरहेको बेला बुधबार रुसी प्रतिनिधिमण्डलले भौतिक पूर्वाधार तथा यातायातमन्त्री वसन्तकुमार नेम्वाङलाई भेट गरी रुस ती परियोजनामा लगानी गर्न इच्छुक रहेको जानकारी गराएको हो ।

नेपालले रुसलाई खासगरी मेट्रो रेलको लागि आर्थिक र प्राविधिक सहयोग गर्न आग्रह गर्दै आएको छ । रुससँग मेट्रो रेल निर्माणको सयौँ वर्ष पुरानो अनुभव छ । भौतिक मन्त्रालयमा भएको भेटवार्तामा मन्त्री नेम्वाङले विश्वव्यापी महामारीका रुपमा फैलिएको कोभिड–१९ विरुद्धको खोप रुसले तयार गरेकामा बधाई दिनुका साथै पूर्ण सफलताको कामना गरेका थिए ।