एमालेले प्रधानमन्त्रीलाई विश्वासको मत नदिने

काठमाडौँ । नेकपा एमालेले प्रधानमन्त्री पुष्पकमल दाहाल प्रचण्डलाई विश्वासको मत नदिने निर्णय गरेको छ । प्रधानमन्त्रीले विश्वासको मत लिनुअघि संसदीय दललाई सम्बोधन गर्दै ओलीले प्रचण्डलाई विश्वासको मत नदिने प्रष्ट पारेका हुन् । अध्यक्ष ओलीले हालसालका उनका अविश्वसनीय कदम, षडयन्त्र र चालबाली हेरेर पनि विश्वास नभएका कारण विश्वासको मत दिन नसक्ने बताए ।

दिउँसो १ बजे प्रतिनिधिसभाको बैठकमा प्रधानमन्त्री पुष्पकमल दाहाल प्रचण्डले विश्वासको मत लिँदैछन् । यसअघि गत पुस १० गते प्रधानमन्त्री नियुक्त भएका प्रचण्डले पुस २६ गते विश्वासको मत लिएका थिए । त्यतिबेला संसद बैठकमा उपस्थित २७० सांसदहरुमध्ये प्रचण्डले २६८ मत पाएका थिए ।

तत्कालीन सत्ता गठबन्धनमा रहेका नेकपा एमाले, राप्रपासहित प्रतिपक्षमा रहेको नेपाली कांग्रेसले समेत प्रचण्डलाई विश्वासको मत दिएका थिए । सत्ता समीकरण फेरिएसँगै एमाले र राप्रपाले सरकारको समर्थन फिर्ता लिँदै सरकारबाट बाहिरिएकाले प्रचण्डले पुनः विश्वासको मत लिन लागेका हुन् ।