जग्गा वर्गीकरण गर्ने जिल्लाकै पहिलो स्थानीय तह लिखुपिके

सोलुखुम्बु । सोलुखुम्बुको लिखुपिके गाउँपालिका भू–उपयोग वर्गीकरण गर्ने जिल्लाकै पहिलो स्थानीय तह बनेको छ । आठ स्थानीय तह रहेको जिल्लामा लिखुपिके गाउँपालिकाले जग्गा वर्गीकरणको काम सकेर मालपोत र नापी कार्यालयमा फायल पेस गरेको हो ।

१८ हजार तीन सय ५५ दशमलव ९३ हेक्टर क्षेत्रफलमा फैलिएको उक्त पालिकाले करिब डेढ महिनाको प्रयासमा विभिन्न १० वर्गमा जग्गाको वर्गीकरण गरेको गाउँपालिका अध्यक्ष मिना बस्नेत कार्कीले बताइन् । उनका अनुसार पालिकाले कृषि, बस्ती, खानी, जंगल, औद्योगिक, व्यवसाय लगातको वर्गमा जग्गा वर्गीकरण गरिएको हो । जिल्लामै लामो समयदेखि रोकिएको जग्गा कित्ताकाट तथा अंशबण्डाकोे काम लिखुपिकेमा फुकुवा भएको मालपोत कार्यालय सोलुखुम्बुका मालपोत अधिकृत युवराज भुजेलले बताए । यद्यपि वर्गीकरणमा अझै केही प्राविधिक त्रुटिहरु भने भेटिएकाले थप अध्ययन भइरहेको नापी अधिकृत इन्जिनियर महेश थापाको भनाइ छ ।

यस्तै थुलुङ दुधकोशी गाउँपालिकाले जग्गा वर्गीकरणको काम अन्तिम चरणमा पु-याएको जनाएको छ । खुम्बु पासाङ ल्हामु, माप्यदुधकोशी, सोलुदुधकुण्डले पनि वर्गीकरणको प्रक्रिया थालनी गरेको बताएको छन् । नेपाल सरकारले ल्याएको भू–उपयोग नीतिअनुसार स्थानीय तहहरुले आफ्नो पालिका क्षेत्रको जग्गा वर्गीकरणको कार्य पूरा गर्न नसक्दा लामो समयदेखि जग्गा कित्ताकाट तथा अंशबण्डाको कामहरु प्रभावित भइरहेको छ ।