देशको आर्थिक विकासका लागि व्यावसायिक क्षेत्रको विशेष भूमिका

काठमाडौं ।
राष्ट्रपति विद्यादेवी भण्डारीले देशको आर्थिक विकासका लागि व्यावसायिक क्षेत्रको विशेष भूमिका रहने बताएकी छिन् । आर्थिक विकासबाट नै समृद्धि हासिल हुने भएकाले उक्त दृष्टिकोणलाई साकार तुल्याउन व्यावसायिक क्षेत्रको विशेष भूमिका खेल्नुपर्ने बताइन् ।

नेपाल चेम्बर अफ कमर्सको ७०औँ वार्षिकोत्सवको अवसरमा राष्ट्रपति कार्यालय, महाराजगञ्जमा सोमबार आयोजित विशेष कार्यक्रमको उद्घाटन गर्दै उनले चेम्बरजस्ता संस्थाबाट देशको आर्थिक विकास एवं व्यापार व्यवसाय विस्तार गर्न महत्वपूर्ण आधार निर्माण भएको बताइन् । नेपाली उत्पादनलाई अन्तर्राष्ट्रिय बजारमा पु-याउन विभिन्न प्रदर्शनीहरूको आयोजना गर्नुका साथै प्रवर्द्धनात्मक गतिविधिद्वारा नेपाली उद्योगीहरूको व्यावसायिक क्षमता वृद्धि गर्न पनि चेम्बर सफल भएको उनले बताइन् ।

औद्योगिक उत्पादन बढाई मुलुकलाई आत्मनिर्भर तुल्याउँदै व्यापारघाटा न्यून गर्ने संकल्प मुलुकले गरेको सन्दर्भमा चेम्बरको भूमिका अझ महत्वपूर्ण भएको उनको भनाइ थियो । संस्थागत सामाजिक उत्तरदायित्वअन्तर्गत महामारी, बाढी, पहिरो, कोभिड–१९ जस्ता प्राकृतिक प्रकोपबाट प्रभावितहरूलाई राहत तथा पुनर्स्थापना गर्ने कार्यमा चेम्बरले निर्वाह गरेको भूमिकाको समेत राष्ट्रपतिले प्रशंसा गरिन् ।

कार्यक्रममा अर्थमन्त्री विष्णु पौडेलले समृद्ध नेपाल निर्माण गर्ने सरकारको लक्ष्यप्राप्तिका लागि सरकारले निजी क्षेत्रसँग घनिष्ठ सम्बन्ध राख्न चाहेको बताए । ‘तपाईँहरूका समस्या सुन्न र ती समस्या समाधान गर्नमा सरकारको ध्यान छ’, उनले भने, ‘सरकार, निजी क्षेत्र र सहकारी क्षेत्र मिलेर मात्र यो लक्ष्य पूरा गर्न सकिन्छ । आउने दिनमा पनि तपाईँहरूसँग जीवन्त सहकार्यका लागि सरकार आह्वान गर्दछ ।” नेपाल चेम्बर अफ कमर्सका अध्यक्ष राजेशकाजी श्रेष्ठले नेपालको निजी क्षेत्र सरकारले अघि सारेको ‘समृद्ध नेपाल सुखी नेपाली’ महाअभियानको सारथि भएको बताए ।

‘सरकार र निजी क्षेत्र समृद्धिका निम्ति एक रथका दुई पांग्रा हुन्’, उनले भने, ‘हामी उच्चतम सहकार्यको संस्कृति निर्माण गर्न चाहन्छौँ ।’ यसैगरी चेम्बरले आफ्नो ७० वर्षे इतिहास झल्कने स्मृति ग्रन्थ समेत प्रकाशित गरेको छ । ग्रन्थको राष्ट्रपति भण्डारीले विमोचन गरेकी हुन् । स्थापनाको ७०औँ वार्षिकोत्सवको अवसर पारेर चेम्बरले ‘नेपाल चेम्बर अफ कमर्स : स्मृति ग्रन्थ (२००७—२०७७)’ प्रकाशित गरेको हो । स्मृतिग्रन्थमा नेपाल चेम्बर अफ कमर्सको विकासक्रम, नेपालको व्यावसायिक इतिहास, पूर्वअध्यक्षहरूको परिचय, चेम्बरका ऐतिहासिक तस्बिरलगायतका सामग्री समेटिएका छन् ।

पूर्वअध्यक्षहरू सम्मानित : राष्ट्रपति विद्यादेवी भण्डारीले नेपाल चेम्बर अफ कमर्सले ७० वर्षको अवधिमा अध्यक्ष भई संस्थाको नेतृत्व गरेका पूर्वअध्यक्षहरूलाई सम्मान समेत गरेकी छिन् । दिवंगत अध्यक्षहरूका परिवार तथा सन्ततिहरूले सम्मान ग्रहण गरेका थिए ।

संस्थापक अध्यक्षहरू स्व. लोकनाथ जोशी, स्व. जुद्धबहादुर श्रेष्ठ, स्व. बिहारीलाल खेतान, स्व. गोवद्र्धनलाल मास्के, स्व. रतिराम अग्रवाल, स्व. जनकदास श्रेष्ठ, स्व. बालकृष्ण श्रेष्ठ, स्व. इन्द्रभक्त श्रेष्ठ, स्व. राजबहादुर चिपालु, स्व. बनवारीलाल मित्तल, स्व. ईश्वरलाल श्रेष्ठका परिवार तथा सन्ततिले सम्मान ग्रहण गरे । यस्तै पूर्वअध्यक्षहरू महेश कुमार अग्रवाल, सुरेन्द्रवीर मालाकार, निवर्तमान अध्यक्ष सुरेशकुमार बस्नेत र हालका अध्यक्ष राजेशकाजी श्रेष्ठलाई राष्ट्रपति भण्डारीले सम्मानपत्र प्रदान गरेकी थिइन् ।