Techie
सहकारी–कृषि

कुखुरा बिक्री नहुँदा किसान चिन्तित

सुबास बस्नेत
दोलखा, भदौ २१
लामो समय चलेको लकडाउनले फुर्सादिला बनेका युवाले गाउँमा कुखुरा व्यवसाय सुरु गरेका छन् । तर उनीहरूले पालेका कखुरा बिक्री गर्नको लागि भने समस्या गरेको छ । जिल्लाको वैतेश्वर गाउँपालिकाभित्रका करिब एक दर्जन युवाले लकडाउनको समयलाई सदुपयोग गर्दै कुखुरापालन व्यवसाय सुरु गरेका थिए । असारदेखि कुखुरा पालनमा लागेका उनीहरूले दुई महिनाको अवधिमा करिब आठ सय कुखुरा उत्पादन गरेका छन् ।

एक लाख ५० हजार लगानी गरेर एक महिनाअघिदेखि कुखुरापालनमा व्यस्त बनेका पाइलेका युवा विशाल बस्नेतले तीनदेखि चार केजी तौलका २ सयवटा कुखुरा उत्पादन गरेका छन् । तर बिक्री गर्न तयार भएको कुखुरा बिक्री गर्न नसक्दा समस्या परेको उनले बताए ।

दोलखामा गत तीन हप्तादेखि निषेधाज्ञा लागू भएपछि सवारीसाधन चल्न नसक्दा कुखुरा बिक्री गर्न थप समस्या भएको सोही गाउँका अर्का व्यवसायी राजु बस्नेतले बताए । खोरमा बिक्रीका लागि तयारी अवस्थामा रहेका कुखुरा बजारसम्म पु¥याउन नसक्दा समस्या भएको उनले बताए । अहिले बजारमै पनि कुखुराको माग न्यून रहेको छ । कतिपय पसलेले कुखुरा बिक्री नहुँदा मासु पसल नै बन्द गर्नुपरेको बताएका छन् । बजारमा ब्वायलर कुखुराको मासुको मूल्यमा गिरावट आएको छ ।

गाउँबाट बाहिरी जिल्लामा कुखुरा निर्यात गर्न नसक्दा मासुको मूल्यमा गिरावट आएको व्यवसायीहरूको गुनासो रहेको छ । एक/दुई हप्ताअघि जिउँदो कुखुराको मूल्य प्रतिकेजी तीन सय ९० रूपैयाँ रहेकोमा अहिले एक सय ९० रूपैयाँमा बेच्न पनि समस्या भएको बस्नेतले बताए ।

कोरोना भाइरसको संक्रमण तीव्र गतिमा बढ्दै गएपछि ५० भन्दा बढी जिल्लामा निषेधाज्ञा गरिएको छ । कोरोना भाइरसको रोकथाम तथा नियन्त्रणका लागि लागू गरेको निषेधाज्ञाका कारण जिल्लाका मासु पसलहरूमा गाउँघरमा उत्पादन भएका कुखुरा बजारसम्म ल्याउन समस्या भएको चरीकोटका मासु पसलेहरू बताउँछन् ।

कुखुरा व्यवसायी किसान बस्नेतका अनुसार ४५ दिनभन्दा बढी कुखुरा पाल्दा उत्पादन लागत पनि उठ्दैन । उनले भने, ‘कुखुरा र तरकारी एउटैजस्तै हो । लामो समयसम्म भण्डार गरेर राख्न मिल्दैन । अहिले मासु खपत हुने ठाँउ बन्दजस्तै छ ।’ वैतेश्वर गाउँपालिका विभिन्न गाउँमा व्यवसायी कुखुरा पालन गर्दै आएका अन्य धेरै किसान अहिले कुखुरा बिक्री नहुँदा आर्थिक समस्यामा परेको बताउँदै आएका छन् ।

यो पनि पढनुहोस