अलैंची किसान चिन्तित

महेन्द्र शाही
सोलुखुम्बु, पुस २९
अलैँची उत्पादनमा गिरावट आएसँगैै सोलुखुम्बुको लिखुपिके क्षेत्रका कृषक चिन्तित बनेका छन् । अलैँचीको पकेट क्षेत्र मानिने लिखुपिकेमा केही वर्षयता रोग तथा कीराका कारण अलैंची उत्पादनमा निरन्तर गिरावट आएसँगै कृषक चिन्तित बनेका हुन् । करिब ४ वर्षयता भाउ ओरालो लागेसँगै उत्पादनमा समेत भारी गिरावट आउँदा कृषक दोहोरो मारमा परेका छन् ।

गत वर्ष ४ देखि ५ मनसम्म उत्पादन भएको बारीमा यस वर्ष १ देखि २ मन सम्म मात्रै उत्पादन भएको १५ वर्षदेखि अलैँची खेती गर्दै आएका कृषक प्रेमबहादुर बस्नेतको भनाइ छ । सबैतिरबाट पीडा भइरहेको उनको भनाइ छ । करिब ३ वर्ष अघिसम्म प्रतिकिलो दुई हजार पाँच सय रूपैँयासम्ममा बिक्री भएको अलैँची अहिले प्रतिकिलो पाँच सय रूपैँयामा पनि बिक्री हुन छोडेको कृषकले बताएका छन् ।

मनमा बिक्री हुने अलैँची ३ वर्ष पहिलेसम्म मनको एक लाखभन्दा बढीमा बिक्री गरेको बताउने किसान अहिले उत्पादन कम भएको तथा बिक्री पनि मनमा २० हजारमा पनि बिक्री नभएको बताउँछन् । उनीहरूका अनुसार पात सुक्ने, झर्ने, फल लाग्ने समयमा फूलमा ढुसी आउनेजस्ता समस्याले अलैँची खेती ओरालो लागेको हो ।

अलैँची खेती ओरालो लागेसँगै कृषकहरू अन्य खेती गर्नतर्फ लागेका छन् । केहि वर्षसम्म राम्रो आम्दानी हुँदा खेतबारी मासेर अलैँची लगाएका कृषकहरू यतिखेर धमाधम किबीलगायतका अन्य खेतीतर्फ आकर्षित भएको अर्का किसान शिवबहादुर बस्नेतले बताए । यो क्षेत्रको माटोमा समस्या देखिएकाले अहिललाई नयाँ अलैँचीका बिरुवा नलगाउन गाउँपालिकाले नै सबै किसानलाई अनुरोध गरेका छ ।