नबिल इन्भेस्टमेन्ट र स्वस्तिक लघुवित्तबीच सम्झौता

काठमाडौं । नबिल इन्भेस्टमेन्ट बैंकिङ र स्वस्तिक लघुवित्त वित्तीय संस्थाबीच सम्झौता भएको छ । संस्थाले आफ्नो अधिकृत पुँजीको ४० प्रतिशत सेयर सर्वसाधारणका लागि निष्काशन गर्नेसम्बन्धी सम्झौता गरेको हो । सम्झौतापत्रमा लघुवित्तका तर्फबाट प्रमुख कार्यकारी अधिकृत धिरेन्द्रलाल कर्ण र निष्काशन तथा बिक्री प्रबन्धक नबिल इन्भेस्टमेन्टको तर्फबाट प्रमुख कार्यकारी अधिकृत मनीष नारायण जोशीले हस्ताक्षर गरेका हुन् ।

कम्पनी ऐन २०६३ बमोजिम स्थापित स्वस्तिक लघुवित्त वित्तीय संस्थाको रजिस्टर्ड कार्यालय सिरहा जिल्ला लहान नपा वडा नम्बर ८ मा रहेको छ । स्वस्तिक लघुवित्त मधेश प्रदेशस्तरको लघुवित्त वित्तीय संस्था हो र हाल १३ हजारभन्दा बढी परिवारमा वित्तीय सेवा प्रदान गर्दै आइरहेको छ । आज भएको सम्झौतामा नबिल इन्भेस्टमेन्टले स्वस्तिक लघुवित्त वित्तीय संस्थाको सेयर सार्वजनिक निष्काशनको माध्यमबाट सर्वसाधारणमा निष्काशनका लागि आवश्यक पूर्वतयारीमा रहेको जनाएको छ । पूर्वतयारी सम्पन्न भएपछि नियामक निकायबाट सेयर निष्काशनका लागि अनुमति माग गरिने संस्थाले जानकारी दिएको छ।