अजोड इन्स्योरेन्सले ३० करोड रूपैयाँको साधारण सेयर जारी गर्ने
काठमाडौं, असार १८
अजोड इन्स्योरेन्स कम्पनीले ३० करोड रूपैयाँबराबरको साधारण सेयर जारी गर्ने भएको छ । कम्पनीले यही असार २५ गतेबाट एक सय रूपैयाँ अंकित मूल्य कायम रहने गरी ३० लाख कित्ता साधारण सेयर जारी गर्न लागेको हो । बिक्री प्रबन्धक एनआईबीएल एस क्यापिटल लिमिटेड रहेको कम्पनीको सेयर बिक्री कार्य छिटोमा असार २९ गते एवं ढिलोमा साउन आठ गते बन्द हुुनेछ ।

कुुल सेयरमध्येमा चार प्रतिशत अर्थात् एक लाख २० हजार कित्ता कर्मचारीलाई र पाँच प्रतिशत अर्थात् एक लाख ५० हजार सामूहिक लगानी कोषलाई छुट्ट्याइएको छ । बाँकी रहेको २७ लाख ३० हजार कित्ता भने सर्वसारणमा बिक्री गरिने कम्पनीले जनाएको छ । कम्पनीका अनुसार सर्वसाधारणले न्यूनतम १० देखि १० हजार कित्तासम्मको सेयर खरिद लागि आवेदन दिन दिन सक्नेछन् । हाल ७० करोड रूपैयाँ चुक्ता पुँजी रहेको कम्पनीको साधारण सेयरको बिक्रीपश्चात् भने चुक्ता पुँजी एक अर्ब रूपैयाँ पुुग्नेछ ।