सिटिजन्स बैंकको सिटिजन्स स्मार्ट बचत खाता

काठमाडौं, माघ २३
सिटिजन्स बैंक इन्टरनेसनल लिमिटेडले युवावर्ग तथा प्रविधिमैत्री व्यक्तिहरूलाई लक्षित गर्ने अभिप्रायका साथ ‘सिटिजन्स स्मार्ट बचत खाता’ को शुभारम्भ गरेको छ । बैंकका अनुसार निक्षेप योजनाअन्तर्गत व्यक्तिगत ग्राहकहरूले यो खाता बैकको कुनै पनि शाखामार्फत शून्य मौज्दातमा खोल्न पाउनेछन् ।

योजनाअन्तर्गत ग्राहकहरूले निःशुल्क अन्तरशाखा कारोबार, अनलाइन कारोबार गर्न सुरक्षित थ्रिडी सेक्युर प्रविधिमा निःशुल्क दर्ता तथा निःशुल्क डिम्याट खाता खोल्न पाउनेजस्ता अनेकन आकर्षक सुविधाहरू उपलब्ध छन् । योजनाअन्तर्गत ग्राहकहरूले डेबिट कार्ड, ई–बैकिङ र मोबाइल बैकिङमा प्रत्येक वर्षको वार्षिक शुल्कमा ५० प्रतिशत छुट पाउनेछन् । यो खाताबाहकहरूले जुनसुकै एटीएमबाट पैसा निकाल्दा शुल्क लाग्ने छैन । दैनिक मौज्दातमा छ प्रतिशत ब्याज गणना गरी त्रैमासिकरूपमा भुक्तानी गर्नु यस योजनाको प्रमुख विशेषता रहेको कुरा बैंकले जानकारी दिएको छ । यो खाता पूर्णरूपमा डिजिटल प्रविधि तथा कागजरहित (वातावरणमैत्री) हुने भएकोले यस खातामा बैकले चेक बुक तथा बैंक स्टेटमेन्ट भने उपलब्ध गराउने छैन ।

यस निक्षेप योजनाबाट बैंकका ग्राहकहरू लाभान्वित हुने विश्वास बैंकले लिएको छ । बैकले हाल ८९ वटा शाखा, ९० वटा एटीएम र एक सय तीनवटा शाखारहित बैकिङ इकाइहरूबाट करिब पाँच लाख ग्राहकवर्गलाई आधुनिक बैकिङ सेवाहरू प्रदान गर्दै आएको छ । ग्राहकवर्गहरूलाई विभिन्न किसिमका निक्षेप तथा कर्जा सुविधाहरू, घरैमा बसेर बैंक खाता खोल्न सकिने अनलाइन सुविधा, रेमिट्यान्स सेवा, आस्वा, ड्राफ्ट, कार्ड सेवा, साथै कुनै पनि शाखाबाट रकम झिक्न र राख्न सकिनेजस्ता सुविधाहरू पनि उपलब्ध गराउँदै आएको छ ।