नवनियुक्त कर्मचारीलाई राष्ट्रिय वाणिज्य बैंकको तालिम

काठमाडौं । राष्ट्रिय वाणिज्य बैंक लिमिटेडले नवनियुक्त सहायक प्रशासन सेवाका ५४ जना कर्मचारीहरूलाई सोमबारबाट १४ दिने पूर्वसेवाकालीन तालिम सुरु गरेको छ । बैंकले बागमती र गण्डकी प्रदेशका लागि छनोट भएका नवनियुक्त सहायक प्रशासन सेवाका कर्मचारीलाई तालिम दिएको हो ।

काठमाडौंमा सुरु भएको तालिमको उद्घाटन गर्दै बैंकका प्रमुख कार्यकारी अधिकृत किरणकुमार श्रेष्ठले सैद्धान्तिक ज्ञानले मात्र प्रतिस्पर्धामा सफलता हासिल गर्न नसकिने भएकाकले तालिम दिइएको बताए । तालिमबाट प्राप्त हुने व्यावहारिक ज्ञानले कार्यस्थलमा नागरिकलाई सेवा दिन सहयोग पुग्ने र संस्थाको उत्पादकत्व वृद्धि हुने विश्वास व्यक्त गरे ।

सीईओ श्रेष्ठले अन्य प्रदेशका सहायकस्तरका कर्मचारीहरूको भर्ना प्रक्रिया छिटै पूरा भएपछि पुरानो बैंक नयाँ कर्मचारीले युक्त हुने बताए । नयब प्रमुख कार्यकारी अधिकृत सरस्वती अधिकारीले नवनियुक्त कर्मचारीहरूलाई कार्यस्थलमा जिम्मेवारी वहन गर्दा अपनाउनुपर्ने कर्तव्यबोध गराइन् । बैंकका उपकार्यकारी अधिकृत देवेशप्रसाद लोहनीले प्रविधिको प्रयोगबाट बढिरहेको जोखिमबाट सचेत भएर डिजिटल बैंकिङ कारोबार बढाउनुपर्नेमा जोड दिए । बैंकको मानव संसाधन विभागका विभागीय प्रमुख भीमप्रसाद घिमिरेले नवनियुक्त कर्मचारीहरूलाई बैंकको कर्मचारी सेवा विनियमावलीबमोजिम शपथ गराए ।

बैंकले देशका ७७ वटै जिल्लाका दुई सय ६५ शाखा कार्यालय, ५२ एक्सटेन्सन काउन्नटर, दुई सय ६९ एटीएम लर ९९ शाखारहित बैंकिङ इकाइहरूबाट बैंकिङ सेवा प्रदान गर्दै आएको छ ।