प्रभु क्यापिटलको लगानी व्यवस्थापन सेवाको शुल्कमा छुट

काठमाडौं । प्रभु क्यापिटल लिमिटेडले लगानी व्यवस्थापन सेवामा आफ्ना हितग्राही खातावालाहरूलाई वार्षिक शुल्कमा आजीवन शतप्रतिशत छुटको अफर ल्याएको छ ।

‘नयाँ वर्षमा प्रभु क्यापिटलको उपहार, वार्षिक शुल्कमा छुटको बहार’ भन्ने नाराका साथ यो अफर जेठ महिनासम्म सञ्चालनमा ल्याउने क्यापिटलले जनाएकोे छ । यो अवधिभित्र डिम्याट खाता खोल्ने हितग्राहीले लगानी व्यवस्थापन सेवाको आजीवन वार्षिक शुल्कमा शतप्रतिशत छुट पाउनेछन् ।

लगानीकर्ताले तीन लाख रुपैयाँबाट लगानी व्यवस्थापन सुरु गर्न सक्नेछन् । तीन लाख ग्राहकले क्यास, आफ्नो सेयर पोर्टफोलियो, अथवा क्यास र सेयर पोर्टफोलियो मिक्स गरी लगानी व्यवस्थापन सुरु गर्न सक्नेछन् ।

क्यापिटलका अनुसार लगानी व्यवस्थापन सेवा योजनामा संलग्न भएका सेवाग्राहीले दैनिकरूपमा अनलाइनबाटै आफ्नो पोर्टफोलियो हेर्नसक्ने तथा साप्ताहिक पोर्टफोलियोको विवरण इमेलमार्फत पाउनेछन् ।

ग्राहकले प्रभु क्यापिटलको डिजिटल एपमार्फत पनि डिम्याट खाता खोली यस योजनामा सहभागी भई आफ्नो पोर्टफोलियो हेर्नसक्ने सुविधा सुरु गरिसकेको क्यापिटलले जनाएको छ ।