Techie IT
×
गृहपृष्ठनेपालडेढ करोड लगानीमा सरफ उद्योग सञ्चालनमा

डेढ करोड लगानीमा सरफ उद्योग सञ्चालनमा


जिएम यादव
बाँके, माघ २०
बाँकेको बैजनाथ गाउँपालिका वडा नम्बर ५ मा स्वदेशी उत्पादनको रूपमा सरफ उद्योग स्थापना गरिएको छ । देशभर रहेको भारतीय उत्पादनको दबदबालाई विस्थापन गरी स्वदेशी उत्पादनको बजारीकरणको लागि साढे एक करोड लागतमा उद्योग सञ्चालनमा ल्याइएको हो । गत भदौदेखि ‘कर्णाली सोप एण्ड केमिकल इन्डष्ट्रिज’ नामक सरफ उद्योग सञ्चालनमा आएको होे ।

उद्योग वैदेशिक रोजगारीबाट फर्किएका तीन जना युवाहरूले सञ्चालन गरेका हुन् । उद्योगले अहिले यहाँको बजारलाई लक्षित गरी ‘असल’ नामक ब्राण्डका तीनवटा वस्तु उत्पादन गरिरहेको छ । उद्योगका मुख्य उत्पादन सरल नामका सरफ, ट्वाइलेट क्लिनर र फिनाइल उत्पादन भइरहेको कर्णाली सोप एण्ड केमिकल इन्डष्ट्रिजका सञ्चालक तथा म्यानेजर तुलबहादुर खत्रीले बताए । उनका अनुसार उद्योगबाट अन्यको भन्दा गुणस्तरीय सरफहरू उत्पादन भइरहेको छ । उनी २ वर्षको वैदेशिक रोजगारीबाट स्वदेश फर्किएर स्वदेशमा कर्म गर्न लागेका हुन् । दुई वर्ष दक्षिण अफ्रिकामा बसेका खत्री विदेशमा सिकेको सीप र ज्ञानको स्वदेशमै बसेर कर्म गर्ने र लगानी गरेको बताउँछन् ।

‘आफ्नो देशमा केही नयाँ काम गर्नुपर्छ भनेर तीन जना लागिपरेका छौँ’ उनले भने, ‘पश्चिम क्षेत्रमा केही नयाँ गुणस्तरीय उत्पादन दिने हाम्रो उद्देश्य छ ।’ यहाँको उत्पादन अहिले बाँके र बर्दिया जिल्लामा बिक्री वितरण भइरहेको छ । अहिले उद्योगको उत्पादनको बजारमा माग बढ्दै गएको समेत उनले बताए । उनका सहकर्मी पुष्पबहादुर रावल र अक्कलबहादुर सिंह हुन् । ‘बजारमा अहिले भारतीय सरफको दबदबा छ, यसको विस्थापन हाम्रो उद्देश्य हो’ सिंहले भने, ‘असल ब्राण्डलाई मेचीदेखि कालीसम्म पु-याउनेछौं ।’ ‘नाम पनि असल काम पनि असल’ भन्ने मुख्य नाराका साथ उद्योग सञ्चालन भइरहेको हो । पहिलो चरणमा केही संख्यामा बेरोजगारलाई रोजगारी समेत प्रदान गरिएको छ । अर्को वर्षबाट अझै व्यवस्थितरूपमा अघि बढ्ने उनले बताएका छन् ।


क्याटेगोरी : नेपाल

तपाईको प्रतिक्रिया