‘अर्थतन्त्रलाई सही बाटो तर्फ लैजान सहकार्य जरुरी’

काठमाडौं । नेपाल चेम्बर अफ कमर्सका अध्यक्ष राजेन्द्र मल्लले आत्मनिर्भर अर्थतन्त्र निर्माण अभियानमा इकोनोमिक मिडिया र निजी क्षेत्रको सहकार्य आवश्यक रहेको बताएका छन् । निजी क्षेत्र र इकोनोमिक मिडिया एउटै बास्केटमा रहेकोले निजी क्षेत्रका भनाइहरुलाई जनमानसमा पु-याउन इकोनोमिक मिडियाहरुले अहं भूमिका खेलेको उनले बताए ।

इकोनोमिक मिडिया सोसाइटी नेपालका नवनिर्वाचित कार्यसमितिको सम्मानमा चेम्बरद्वारा आयोजित कार्यक्रममा अध्यक्ष मल्लले सरकारले प्रतिबद्धता गरेका कतिपय सुविधाहरु व्यवहारमा लागू गर्न नसकेको उल्लेख गर्दै उक्त प्रतिबद्धताहरुलाई प्रभावकारी कार्यान्वयनका लागि सम्बन्धित पक्षलाई घचघच्याउन मिडियाको भूमिका अपरिहार्य रहेको बताए ।

सोही अवसरमा इकोनोमिक मिडिया सोसाइटी नेपालका अध्यक्ष रामराजा श्रेष्ठले आर्थिक नीति निर्माणमा पैरवी गर्ने, आर्थिक मन्दीका सन्दर्भमा निजी क्षेत्रसँग समन्वय गर्ने र निजी क्षेत्रका चुनौतीहरुलाई सम्प्रेषण गर्ने उद्देश्यले यस संस्थाको स्थापना भएको बताए । संस्थाको भूमिकामा केही कमजोरी भए सुझाव दिन पनि उनले आग्रह गरे ।