खर्चिलो बन्दै तीज !

हिन्दू महिलाहरूको महानपर्व हरितालिका तीज मनाउने शैली परिवर्तन हुँदै गएको छ । भाद्र शुक्ल द्वितीयादेखि पञ्चमीसम्मको अवधिलाई तीजको रूपमा मनाउने परम्परा रहेको छ । तर पछिल्लो समय एक महिना अगाडिदेखि नै पार्टी ¥यालेसहरू महँगो खर्चमा तीज मनाउन थालिएको छ ।तीजको परम्परा र मान्यताका बारेमा हिन्दुशास्त्र र पुराणहरूमा विभिन्नविभिन्न किसिमका कथा, वर्णन र चर्चा गरिएका छन् ।

हिन्दुशास्त्रमा बताइएअनुसार सत्ययुगमा हिमालय पुत्री पार्वतीले महादेव स्वामी पाऊँ भनी व्रत बसेकी र उनको व्रत पूर्ण भई उनले महादेव पति पाएको दिनलाई उत्सव मानेर तीज पर्वको सुरूवात भएको भन्ने मान्यता रहेको पण्डित नवराज ढुङ्गेल बताउँछन् । पछिल्लो समय, काल र युग परिवर्तन हुँदै जाँदा मान्यता, परम्परा, संस्कृति, प्रचलनमा पनि खर्चिलो पन आएको उनले बताए । उनका अनुसार तीजको खास मौलिकता भनेको अविवाहित महिलाले राम्रो वा उपयुक्त वर पाउनका लागि भगवान्सँग प्रार्थना गर्नु, विवाहित महिलाले आफ्नो वर र सन्ततिको सुस्वास्थ्य र दीर्घायुको कामना गर्नु, चोखो र शुद्ध भोजन ग्रहण गर्नु, माइतीघर जानु, मीठो मसिनो खानु, हरिया र राता कपडा लगाउनु, सामथ्र्यअनुसार गरगहनाबाट सिँगारिनु, घरमाइतीका सुखदुःख साटासाट गर्नु, भगवान् वा नारी वेदनाका गीत गाई नाचगान गर्नु हुन् । तर पछिल्लो समय तीज मनाउने नाममा विभिन्न विकृति भित्रिँदै गएको उनले बताए ।

पहिलेको चार दिनमा मनाइने तीज अहिले चार हप्ता मनाउँदा पनि नसकिने गरेको उनले बताए । तीज मनाउने परम्परा मात्रै नभई तीज गाइने गीतको मौलिकता र विशेषता समेत हराउँदै गएको उनले बताए ।यता बैतेश्वर गाउँपालिकाले वडामै महिलालाई बोलाएर दर खुवाउने तथा सांस्कृतिक कार्यक्रम गरेर तीज मनाएको छ । तीजको परम्पराअनुसार दर खाने दिनमा नै पालिकाभित्रका सबै वडामा दर खुवाउने कार्यक्रम गरिएको पालिका उपाध्यक्ष कल्पना उप्रेतीले जानकारी दिइन् ।