महानगरद्वारा जसपा नेता समात्ने नगरप्रहरीलाई जिम्मेवारीबाट हटाइयो

विराटनगर । जनता समाजवादी पार्टी मोरङ अध्यक्ष तथा औषधि व्यावसायी राजकुमार यादवलाई पक्राउ गर्ने नगरप्रहरीलाई विराटनगर महानगरपालिकाले जिम्मेवारीबाट हटाएको छ । महानगरपालिकाले एक प्रहरी हवल्दार र दुई नगरप्रहरी जवानलाई मंगलबारदेखि नगरप्रहरीको जिम्मेवारीबाट हटाएको हो ।

पार्कीङको विषयमा विवाद हुँदा जसपा नेता यादव र प्रहरी जवानबीच विवाद भएपछि पुगेको नगरप्रहरीले जसपा नेता यादवलाई औषधि पसलबाट समातेर वडा प्रहरी कार्यालय विराटनगरमा पुर्याएको थियो ।

जसपा नेता यादवलाई नगर प्रहरीले समातेर ल्याएपछि जसपा कार्यकर्ताले आन्दोलन गरेका थिए । नगरप्रमुख नागेश कोइरालाले आन्दोलनपछि नगरप्रहरीलाई नगरप्रहरी सेवाको जिम्मेवारीबाट हटाएका हुन् ।

जसपाको प्रदर्शनपछि महानगरपालिकामा भदौं ३१ गते महानगर प्रमुख र जसपा नेताबीच छानविन गरी कारवाही गर्ने सहमति भएको थियो । मेयर नागेश कोइरालाले छानबिनपछि नगरप्रहरी हलल्दार रमेश निरौला भण्डारी, नगरप्रहरी जवान विक्रम श्रेष्ठ र बब्लु केशरीलाई नगरप्रहरी सेवाबाट हटाएको जानकारी दिएका छन् ।