आँबुखैरेनी गाउँपालिकाले नौ महिनामा ग-यो उत्कृष्ट ३२ काम

काठमाडौं । तनहुँको आँबुखैरेनी गाउँपालिकाले चालू आर्थिक वर्षको नौ महिनामा गरेका ३२ उत्कृष्ट कामहरु सार्वजनिक गरेको छ । गाउँपालिकाले स्वास्थ्य, शिक्षा, कृषि, भौतिक पूर्वाधार, सामाजिक सुरक्षा, पर्यटन, वातावरणलगायतका क्षेत्रमा महत्वपूर्ण एवं लोकप्रिय काम गरेको हो ।

पालिकाका अध्यक्ष शुक्र चुमाङको सक्रियतामा चालू आर्थिक वर्षको नौ महिनामा दर्जनौँ लोकप्रिय कामहरुको सम्पन्न भएको र दर्जनौँ कामहरुको सुरुवाती चरणमा रहेको छ । स्वास्थ्य क्षेत्रमा पालिकाले एमबीबीएस डाक्टरसहित २४सै घण्टा स्वास्थ्य सेवा प्रदान गर्ने १५ श्ययाको अस्पताल सञ्चालन गरेको छ ।

अस्पतालमा एक्सरे, ल्याब, ईसीजी, ओपीडी, इमर्जेन्सी, सुत्केरी, रेबिज खोप, गर्भपतन, आँखाको उपचारलगायतका सेवाहरु सञ्चालनमा रहेका छन् । सुत्केरी, ज्येष्ठ नागरिक र विपन्न परिवारलाई निःशुल्क सेवा उपलब्ध गराएको छ ।

क्यान्सर तथा जटिल रोग लागेका बिरामीलाई पालिकाकै स्रोतबाट ५० हजार आर्थिक सहायता उपलब्ध गराउने गरेको छ भने विशेषज्ञहरुको सहभागितामा स्वास्थ्य शिविर सञ्चालन गर्दै आएको छ ।

शिक्षा क्षेत्रमा पालिकाले आवश्यकताको आधारमा विद्यालयहरुलाई बस खरिद पक्रिया अगाडि बढाएको छ । पाँच कक्षासम्म पढ्ने विद्यार्थीलाई पोशाक तथा झोला वितरण, गाउँ शिक्षा कोष स्थापना र जनप्रतिनिधिका छोराछोरीलाई अनिवार्य सामुदायिक विद्यालय भर्नाको कार्यक्रम लागू गरेको छ । त्यस्तै, पालिकाले शिक्षा क्षेत्रमा विद्यालयमा स्मार्ट कक्षाको निर्माण र ई–लर्निङ सेन्टरको निर्माण प्रक्रियालाई अगाडि बढाएको छ ।

पर्यटन क्षेत्रको विकासका लागि पालिकाले ऐना पहरामा सिसाको पुल निर्माण र छिम्केश्वरीमा केबलकार निर्माणको लागि तयारी अगाडि बढाएको छ । गाउँपालिकाले घर बनाउँदा निःशुल्क नक्सा पास गर्ने व्यवस्था लागू गरेको छ भने एक वडा एक कालोपत्रे सडक र नक्सापास प्रणाली लागू गरेको छ ।

यस्तै कृषि क्षेत्रलाई विकास गर्ने उद्देश्यले पालिकाले कृत्रिम गर्भाधान मिसन कार्यक्रम, कृषि व्यवसाय प्रवद्र्धन केन्द्र, हाटबजार र एक वडा एक उत्पादन कार्यक्रमलगायत थुप्रै लोकप्रिय कार्यक्रम सञ्चालन गरेको छ । प्रत्येक वडामा नागरिक सेवा केन्द्र र सहिद परिवार तथा घाइते अपाङ्गलाई जीवन निर्वाह भत्ता वितरणलगायतका लोकप्रिय कामहरु पालिकाले अगाडि बढाएको छ ।

उद्यम विकासको क्षेत्रमा पनि आँबुखैरेनीले उद्यम विकास केन्द्रको निर्माण र विभिन्न किसिमका तालिम सञ्चालन गर्नेगरेको छ । पालिकाले सुशासन स्थापनाको लागि विद्युतीय हाजिरी, अनलाइन राजस्व प्रणाली, अनलाइन योजना सम्झौता, डिजिटल नागरिक वडापत्र र सूचना फेसबुक र वेबसाइटबाट प्रकाशन गर्ने पद्धतिलाई अंगीकार गर्दै आएको छ ।