किबी महोत्सवमा सुन्तला व्यापारी सम्मानित

सुबास बस्नेत
दोलखा, पुस २३
नेपाल भ्रमण वर्ष २०२० लाई लक्षित गर्दै सुरु भएको सातदिने किबी महोत्सव सम्पन्न भएको छ । सात दिनसम्म चलेको महोत्सव विभिन्न कृषकहरुलाई सम्मान गर्दै मंगलबार सकिएको हो । महोत्सवमा किबी कृषकभन्दा अन्य कृषकहरुलाई सम्मान गरिएकोमा किबी कृषकहरुले भने दुखेसो पोखेका छन् । महोत्सव आयोजना समितिले किबी कृषक भनेर सुन्तला कृषकलाई सम्मान गरेको भिमेश्वर नगरपालिका वडा नम्बर ६ कि मोतिमया तामाङले बताइन् ।

उनले महोत्सबभरी ५० हजार रुपैयाँको किबी बिक्रीको जानकारी दिइन् । यसैगरी महोत्सवमा १२ हजारको सुन्तला बिक्री गरेकी मेलुङ गाँउपालिकाकी कृषक लक्ष्मी उप्रेती सम्मानित भएकी छिन् । नगरपालिकाले किबी फलको पहिचान र प्रर्वद्धन गर्ने उदेश्यले करिब एक साता अघिबाट जिल्लाको सदरमुकाम चरिकोटमा महोत्सवको सुरु गरेको थियो । सात दिन चलेको महोत्सवको भ्रमण वर्षको अवसरमा दोलखा घुम्न आएका पर्यटक र जिल्लाका नौ स्थानीय तहका करिब ४० हजार नगरिकले अवलोकन गरेको महोत्सव आयोजना समितिले जनाएको छ ।