साउदीको दमाममा निगमको नियमित उडान सुरु

काठमाडौं । नेपाल वायुसेवा निगमले साउदी अरेबियाको दमाममा नियमित सिधा उडान सुरु गरेको छ । निगमले बुधबारदेखि काठमाडौंबाट दमाममा नियमित सिधा उडान सुरु गरेको निगमका प्रवक्ता रमेश पौडेलले जानकारी दिए ।

उडान तालिकाअनुसार काठमाडौंबाट बुधबार राति १०ः४० मा उडान भरेको निगमको पहिलो उडानमा एक सय २६ जना यात्रु रहेका थिए भने फर्कदा एक सय १७ जना यात्रु रहेका थिए । काठमाडौं–दमाम–काठमाडौं सेक्टरमा निगमले हप्ताको दुई दिन बुधबार र शनिबार उडान गर्ने जनाएको छ ।

बजारको माग तथा निगमको बजार व्यवस्थापनअनुसार उडानको संख्या बढाउँदै लैजाने योजना रहेको प्रवक्ता पौडेलले बताए । यात्रुले निगमको कार्यालय वा निगमको वेवसाइटमा लगइन गरी अनलाइनबाट वा नजिकको ट्राभल एजेन्सीबाट टिकट लिई सहजरूपमा यात्रा गर्न सक्ने बताइएको छ । यसबाट यात्रलाई थप सुविधा पुग्ने निगमले विश्वास लिएको छ ।