बीवाईडी शीर्ष १० अटोमोबाइल ब्रान्ड बन्न सफल

काठमाडौं । न्यु इनर्जी भेहिकल निर्माता कम्पनी बीवाईडी शीर्ष १० अटोमोबाइल ब्रान्ड बन्न सफल भएको छ । मर्सिडिज बेन्ज समूह र बीएमडब्लुलाई पछि पार्दै बीवाईडी पहिलो पटक बिक्रीको आधारमा विश्वका १० ठूला कार कम्पनीहरूमा सामेल भएको छ ।

बीवाईडीको विश्वव्यापी नयाँ गाडीको बिक्रीमा २०२३ को पहिलो छ महिनामा ९६ प्रतिशतले वृद्धि भएर १२ दशमलव पाँच लाख एनईभीमा पुगेको छ । यसले १० औँ स्थान प्राप्त गरेको हो । बीवाईडीले अगस्टमा दुई लाख ७४ हजार तीन सय ८६ सवारीहरू बेचेको रेकर्ड राखेको छ । कम्पनीले लगातार चौथो महिनाको लागि आफ्नो मासिक डेलिभरी रेकर्ड तोडेको हो । कम्पनीले जारी गरेको आफ्नो पहिलो आधा वर्षको रिपोर्टमा दुई सय ६० दशमलव १२ बिलियन युआन (३५ दशमलव ६६ बिलियन डलर) आम्दानी गरेको देखिएको छ, जुन ७२ दशमलव ७२ प्रतिशतले बढेको हो ।

कम्पनीका अनुसार अटो मेकिङ र सम्बन्धित व्यवसायबाट मात्रै आम्दानी दुई सय आठ दशमलब ८२ बिलियन युआन पुगेको छ । जुन वार्षिकरूपमा ९१ दशमलव एक प्रतिशतले वृद्धि भएको छ । बीवाईडीले प्रगतिको श्रेय कम्पनीको उत्पादन नवाचार र औद्योगिक शृङ्खलामा ठूलो लगानीलाई दिएको छ ।