मातृभूमिमा देखाउन मिल्ने खालको काम गर्न गैरआवासीय नेपालीलाई सुझाव

काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपाली मातृभूमिमा देखाउन मिल्ने उत्कृष्ट मोडलको काम गर्न गैरआवासीय नेपालीलाई सुझाव दिएका छन् । मुलुकको समृद्धिका लागि काम गर्ने बेला आएको भन्दै उनले गैरआवासीय नेपालीसमक्ष लगानी बढाउन समेत आग्रह गरे ।

गैरआवासीय नेपाली संघ (एनआरएनए)को ११औँ विश्व सम्मेलन, एनआरएनए अन्तर्राष्ट्रिय महासभा र तेस्रो एनआरएन ज्ञान विश्व सम्मेलनका अवसरमा उनले नेपालमा लगानीको प्रशस्त सम्भावना भएको उल्लेख गरे । ‘अब एनआरएनएले नेपाली मातृभूमिमा देखाउन मिल्ने उत्कृष्ट मोडलको काम या प्रोजेक्ट कुन हो भनेर देखाउनुपर्ने दिन पनि आएको छ’, उनले भने । अहिलेको पुस्ताले कुराभन्दा बढी काम मन पराउन थालेको भन्दै उनले उनीहरूले बाहना नपत्याउने बताए । ‘अहिलेको पुस्ता कुरा होइन काम गर्न मन पराउँछ । हाम्रा सन्ततिहरूलाई पनि अब कुरा मन पर्न छोडिसक्यो । उनीहरू यो वा त्यो भयो भन्नेमा बहानामा या ‘कन्टेक्स्ट’ मा विश्वास गर्दैनन, ‘कन्टेन्ट’ चाहन्छन् । हामीले भोलिको पुस्ताका लागि पनि केही गर्नुछ, उनीहरूलाई बाटो देखाउनु छ त्यसैले अब काम नै थालौँ भन्ने मेरो आग्रह हो’, उनले भने ।

गैरआवासीय नेपालीहरूलाई सम्मेलनमार्फत कुनै ‘प्रोजेक्ट’ सञ्चालनका लागि प्रतिबद्धता व्यक्त गर्न समेत उनले आग्रह गरे । ‘सम्मेलनमार्फत एउटा प्रतिबद्धता व्यक्त गर्नुहोस्, कुनै ‘प्रोजेक्ट’ नै अघि सार्नुहोस् ता कि त्यो प्रतिबद्धता अर्काे सम्मेलनसम्म आइपुग्दा सम्पन्न होस्’, उनले भने, ‘त्यो प्रतिबद्धता यहाँहरूले पनि यसै अवसरमा गर्नुहोस् अनि दशैँपछि काम नै थालौँ । त्यसका लागि मैले के गर्नुपर्छ, मलाई पनि काम दिनुहोस्, म पनि लागिहाल्छु ।’

विश्वको जुनसकै भूगोलमा रहेको भए पनि त्यहाँ आर्जन गरेको ज्ञान, सीप र पुँजी नेपालमै ल्याउनुपर्नेमा उनले जोड दिए । यस्तै उनले सरकारले गैरआवासीय नेपालीलाई नागरिकता प्रदान गर्ने निर्णयको स्वागत गरे । एकपटकको नेपाली सधैँको नेपाली भन्ने धारणा अब आएर साकार भएको उनले बताए । ‘मलाई लाग्छ हामी नेपाली दाजुभाई जहाँ, जेसुकै कामले र जसरी रहेको भए पनि नेपाली हौँ र सधैँ नेपाली भएरै रहन पाउनुपर्छ । तब पो हामीहरू सबैलाई नेपाली माया र माटोले तानिरहन्छ’, उनले भने ।