बजेट निजी क्षेत्रमैत्री: आरती स्ट्रिप्स

काठमाडौं । आरती स्ट्रिप्स प्रालिले सरकारले ल्याएको आगामी आर्थिक वर्षको बजेट निजी क्षेत्रमैत्री भएको जनाएको छ । बजेटले निजी क्षेत्र उत्साहित देखिएको भन्दै कम्पनीले यस क्षेत्रले लामो समयदेखि उठाउँदै आएको मागहरु समेत सम्बोधन गरेको जनाएको छ ।

उत्पादनमूलक उद्योगको जग्गा हदबन्दी, नेपाल सरकारको जग्गा ५० वर्षसम्मको लागि भाडामा उपलब्ध गराउने, आत्मनिर्भर भएका उद्योगहरूलाई निर्यात गर्दा आठ प्रतिशतसम्म क्यास इन्सेन्टिभ दिने, आइरन, वायर रड, कर्कट जस्तापातालगायतका अन्य फलामजन्य सामग्रीहरुमा देश आत्मनिर्भर भएको अवस्थामा आयात प्रतिस्थापनको नीति हुनेलगायतका विषयहरु स्वागतयोग्य रहेको कम्पनीले जनाएको छ ।

यसका साथसाथै देश फलामजन्य सामग्रीमा आत्मनिर्भर रहेको समेत कम्पनीको भनाइ छ । विदेशी तथा स्वदेशी लगानीमा स्थापित उद्योगहरुले अब सहज रुपमा व्यापार व्यवसाय गर्ने बाटो खुलेको र आयातित फलामजन्य सामग्रीबाट स्वदेशी उत्पादनलाई कुनै पनि समस्या नरहेको कम्पनीले जनाएको छ ।

कम्पनीका अनुसार नेपाल स्टिल, जस्तापाता, विभिन्न वायर एवं फलामजन्य वस्तुमा आत्मनिर्भर रहेको छ । यसका साथै वार्षिक १० करोडभन्दा बढी बिजुली खपत गर्ने उद्योगलाई न्यूनतम दुईदेखि १५ प्रतिशत छुट दिने घोषणा सकारात्मक रहेको कम्पनीले जनाएको छ ।
अर्पाटमेन्टहरु विदेशी नागरिकलाई बिक्री गर्न दिने बजेटको प्रावधानसँगसँगै नेपालमा स्थापित सिमेन्ट र डण्डी उद्योगहरु बिक्रीवितरण हुन सरकारको राजस्वमा समेत थप वृद्धि हुन जाने कम्पनीको भनाइ छ ।

कम्पनीले बजेट चाँडोभन्दा चाँडो प्रभावकारी ढंगले कार्यान्वयन गर्न सरकारसँग आग्रह गरेको छ ।