सीएनआई कोसी एक्स्पोविरुद्ध उच्च अदालतमा रिट

काठमाडौं । विराटनगरमा बिहीबारबाट सुरु भएको सीएनआई कोसी एक्स्पोविरुद्ध उच्च अदालत विराटनगरमा रिट परेको छ । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले बिहीबार एक्स्पोको उद्घाटन गरेका थिए । उक्त एक्स्पोका कारण सार्वजनिक सडकमा आवागमन अवरुद्ध भएको भन्दै कानुनका विद्यार्थी विन्दानन्द नुन्दीले उच्च अदालतमा रिट दिएका हुन् ।

नौ दिनसम्म सञ्चालन हुने एक्स्पोका लागि सडक बन्द गरेका कारण सवारीसाधन र सर्वसाधारणले वैकल्पिक सडक प्रयोग गर्नुपर्नेछ । स्थानीय प्रशासनसँग अनुमति लिएर सडकको केही भाग एक्स्पोमा प्रयोग गरिएको एक्स्पो आयोजक नेपाल उद्योग परिसंघ प्रदेश १ ले जनाएको छ । निवेदक नुन्दीले जस्तापाता प्रयोग गरेर छेकिएको सडक खुलाई आवागन सहज बनाउन अन्तरिम आदेश माग गरेका छन् । रिटमा मोरङका प्रमुख जिल्ला अधिकारी, विराटनगर महानगरपालिका, उद्योग परिसंघ प्रदेश १ र ट्राफिक प्रहरी विपक्षी बनाइएको छ । नागरिकको संवैधानिक मौलिक हक आयोजकले हनन गरेको र सडक अबरुद्ध गरि गैरकानुनी काम गरेको दाबी रिटमा गरिएको छ । विराटनगर– २ शंकरपुरस्थित भित्री सडकलाई दुईतिरबाट छेकेर एक्स्पो आयोजना गरिएको छ ।