निर्माण क्षेत्रलाई भुक्तानी दिन परिसंघको आग्रह

काठमाडौं । नेपाल उद्योग परिसंघले अर्थतन्त्रमा गतिशिलता ल्याउन निर्माण क्षेत्रलाई चलायमान बनाउनुपर्नेमा जोड दिएको छ । परिसंघका कार्यवाहक अध्यक्ष राजेशकुमार अग्रवाल नेतृत्वको परिसंघ टोलीले बिहीबार भौतिक पूर्वाधार तथा यातायातमन्त्री प्रकाश ज्वालालाई भेटी निर्माण क्षेत्रलाई चलायमान बनाए मात्रै अर्थतन्त्रलाई गतिशील हुने बताएको हो ।

परिसंघका कार्यवाहक अध्यक्ष अग्रवालले निर्माण क्षेत्रमा दिइनुपर्ने भुक्तानी छिटो निकासा गर्न आग्रह गरेका छन् । सरकारले भुक्तानी रोक्दा बजारमा तरलता बढ्न नसकेको र अर्थतन्त्रलाई सिथिल बनाएको अग्रवालले बताए ।

यस्तै न्यून मूल्यमा बोलकबोल गर्नेलाई परियोजना दिने विषयमा सुधार गर्न, धेरै परियोजनामा बजेट छर्नुभन्दा निश्चित परियोजना समयमै सक्ने गरी अगाडि बढाउन पनि परिसंघले सुझाव दिएको छ । भेटमा मन्त्री ज्वालाले न्यून मूल्यमा बोलकबोलको विषय विगतमा सुधार गर्न खोजिए पनि कार्यान्वयनमा ल्याउन नसकेको बताए । तर आफूले यसमा सुधार गर्न पहल गर्ने बताए ।