प्रोग्रेसिभ फाइनान्स छ करोड ११ लाख खुद घाटामा

काठमाडौं  । प्रोग्रोसिभ फाइनान्स खुद नोक्सानीमा देखिएको छ । फाइनान्सले चालू आर्थिक वर्षको पहिलो त्रैमासिक अवधिमा छ करोड ११ लाख ८५ हजार छ सय ४४ रुपैयाँ खुद नोक्सानी व्यहोरेको हो । गत आवको सोही अवधिमा भने फाइनान्सले तीन करोड २९ लाख ३१ हजार सात सय ६२ रुपैैयाँ खुद मुनाफा कमाएको थियो ।

हाल हाल चुक्ता पुँजी ८४ करोड ८१ लाख छ हजार रुपैयाँ रहेको फाइनान्सले चालू आवको पहिलो त्रैमासमा चार अर्ब ७६ करोड ९२ लाख २९ हजार छ सय ६९ रुपैयाँ निक्षेप संकलन गरी तीन अर्ब ४२ करोड ८६ लाख १५ हजार नौ सय ३५ रुपैयाँ कर्जा प्रवाह गरेको छ । सो अवधिमा एक करोड २७ लाख ८७ हजार आठ सय ६१ रुपैयाँ खुद ब्याज आम्दानी गरेको फाइनान्समा १२ दशमलव ४५ प्रतिशत कर्जा निष्क्रिय रहेको छ । वितरणयोग्य नाफा भने ३९ करोड ८२ लाख ३२ हजार दुई सय ७५ रुपैयाँले ऋणात्मक रहेको फाइनान्सको स्प्रेडदर भने चार दशमलव ५४ प्रतिशत रहेको छ ।

गत आवको सोही अवधिमा भने फाइनान्सले चार अर्ब ९२ करोड ७७ लाख ४२ हजार आठ सय ७६ रुपैयाँ निक्षेप संकलन गरी तीन अर्ब ३२ करोड ४१ लाख ३९ हजार आठ सय ८३ रुपैयाँ कर्जा प्रवाह गरेको थियो । उक्त अवधिमा पाँच करोड ४७ लाख ४० हजार तीन सय १५ रुपैयाँ खुद ब्याज आम्दानी गरेको फाइनान्समा चार दशमलव २२ प्रतिशत कर्जा निष्क्रिय रहेको थियो भने स्प्रेडदर चार दशमलव ६९ प्रतिशत रहेको थियो ।