एनएमबी लघुवित्तको लाभांश पारित

पोखरा । कास्कीको हेम्जामा केन्द्रीय कार्यालय रहेको एनएमबी लघुवित्त वित्तीय संस्था लिमिटेडको १०औँ वार्षिक साधारणसभाले १० प्रतिशत बोनस सेयर वितरण गर्ने सञ्चालक समितिको प्रस्ताव स्वीकृत गरेको छ । गत शुक्रबार पोखरामा सम्पन साधारणसभाले चुक्ता पुँजीको १० प्रतिशत बोनस सेयर र सोको कर प्रयोजनका लागि शून्य दशमलव ५२६३ प्रतिशत नगद लाभांश वितरण गर्ने सञ्चालक समितिको प्रस्ताव स्वीकृत गरेको हो ।

यस्तै सभाले सञ्चालक समितिको तर्फबाट अध्यक्ष सञ्जिव सुब्बाले पेस गरेको आर्थिक वर्ष २०७८/०७९ को वार्षिक प्रतिवेदनउपर छलफल गरी पारित गरिएको छ । सभाले अन्य लघुवित्तसँग गाभ्ने/गाभिने वा प्राप्तिसम्बन्धी प्रक्रिया अगाडि बढाउन उपयुक्त देखिएमा सो प्रयोजनका लागि समिति गठन गरी, मूल्यांकनकर्ताको नियुक्ति तथा निजको पारिश्रमिक तोक्ने गाभ्ने/गाभिने वा प्राप्तिसम्बन्धी सम्झौतापत्रमा हस्ताक्षर गर्नेलगायतका सम्पूर्ण कार्य गर्ने अख्तियारी सञ्चालक समितिलाई प्रदान गर्ने प्रस्ताव समेत पारित भएको कम्पनी सचिव सूर्य थापाले जनाएका छन् ।