सनराइज बैंकको थप दुई शाखारहित बैंकिङ सेवा

काठमाडौं । सनराइज बैंक लिमिटेडले थप दुई शाखारहित बैंकिङ सेवा विस्तार गरेको छ । बैंकिङ पहुँच नपुगेका देशका विभिन्न स्थानमा अत्याधुनिक बैंकिङ सुविधा पु-याउने उद्देश्यले शाखारहित बैंकिङ सेवा विस्तार गर्दै आएको बैंकले जनाएको छ ।

बैंकले वैशाख १५ गते सुदूरपश्चिम प्रदेशको कञ्चनपुर जिल्लाको कृष्णपुर नगरपालिका वडा नं.७ कलुवापुरर डडेल्धुरा जिल्लाको अजयमेरू गाउँपालिका वडा नं. ५ देवलदिव्यपुरमा शाखारहित बैंकिङ सेवा सुरु गरेको हो । यससँगै बैंकको कुल साहारहित बैंकिङ सेवा संख्या एक सय दुई पुगेको छ ।

सेवा सञ्चालनका लागि कृष्णपुरका करम सिंह राना र देवलदिव्यपुरका नरेश भट्टलाई व्यावसायिक प्रतिनिधिका रूपमा नियुक्त गरेको बैंकले जनाएको छ । यी दुई शाखारहित बैंकिङबाट निक्षेप संकलन, रकम भुक्तानी, रकम स्थानान्तरणलगायत बैंकले प्रदान गर्ने अन्य सेवा उपलब्ध हुनेछन् ।

बैंकले देशभर एक सय ३९ शाखा कार्यालय, १३ एक्सटेन्सन काउन्टर, एक सय ६२ एटीएम, एक सय दुई शाखारहित बैंकिङ सेवामार्फत सेवा प्रदान गर्दै आइरहेको छ ।