सकियो १८औँ ‘जी २०’ शिखर सम्मेलन

भारत । विशाल अर्थतन्त्र भएका १९ राष्ट्र र युरोपेली संघ मिलेर बनेको अन्तरसरकारी संगठन ‘जी २०’को १८औँ शिखर सम्मेलन भारतको राजधानी नयाँदिल्लीमा आइतबार सकिएको छ । जी २० को अध्यक्ष देश भारतका प्रधानमन्त्री नरेन्द्र मोदीले १८औँ शिखर सम्मेलन समाप्त भएको घोषणा गरेका हुन् । उनले भारत मण्डपमा आयोजित बैठकको समीक्षा गर्न आगामी नोभेम्बरको अन्त्यतिर भर्चुअल बैठक गर्ने प्रस्ताव गरेका छन् ।

भारत आगामी नोभेम्बरसम्म जी २० को अध्यक्ष रहनेछ । भारतले गतवर्षको डिसेम्बरमा इन्डोनेसियाको बालीमा भएको १७औँ शिखर सम्मेलनमा जी २० को अध्यक्षता ग्रहण गरेको थियो । प्रधानमन्त्री मोदीले अन्तर्राष्ट्रिय आर्थिक सहयोगका लागि प्रस्ताव गरिएका विषयहरुको समीक्षा आवश्यक रहेको बताएका छन् ।

भारतका प्रधानमन्त्री मोदीले ब्राजिलका राष्ट्रपति लुइज इनासियो लुला दा सिल्भालाई आगामी डिसेम्बर १ देखि जी २० को अध्यक्षता गर्नेगरी प्रतीकात्मक हथौडीसँगै अध्यक्षता हस्तान्न्तरण गरेका छन् । चक्रिय प्रणालीअनुसार ब्राजिलले आगामी डिसेम्बर १ देखि एक वर्षसम्मका लागि समूहको अध्यक्षता गर्नेछ । यससँगै जी २० को १९औँ शिखर सम्मेलन ब्राजिलमा हुनेछ । सम्मेलनले अफ्रिकी संघलाई जी २० को नयाँ सदस्यको रूपमा प्रवेश गराएको छ ।