च्याट जीपीटी निर्माता ओपन एआईका सीईओ अल्टम्यान बर्खास्त

अमेरिका । चर्चित च्याटजीपीटी निर्माता ओपनएआईको सञ्चालक समितिले प्रमुख कार्यकारी अधिकृत (सीईओ) साम अल्टम्यानलाई बर्खास्त गरेको छ । सञ्चालक समितिले आफूहरूसँग राम्रो सञ्चार सम्बन्ध नराखको भन्दै पदबाट हटाएको हो ।

सञ्चालक समितिले अहिलेसम्म उनले दिएको योगदानको लागि कृतज्ञ रहेको तर अहिले नयाँ नेतृत्वको आवश्यकता रहेकोले सो निर्णय गरेको दाबी गरेको छ । उनको बर्खास्तीसिँगै ओपनएआईका प्रमुख टेक्नोलोजी अफिसर मिरा मुरातीले अन्तरिम सीईओको रूपमा काम गर्नेछिन् । स्थायी सीईओका लागि भने औपचारिक खोजी सुरु गर्ने कम्पनीले बताएकोे छ ।

ओपनएआईको सञ्चालक समितिमा प्रमुख वैज्ञानिक इल्या सुत्स्केभर र क्वाराका सीईओ एडम डी एन्जेलो, टेक्नोलोजी उद्यमी टासा म्याककाउली र जर्जटाउन सेन्टर फर सेक्युरिटी एन्ड इमर्जिङ टेक्नोलोजीका हेलेन टोनरजस्ता स्वतन्त्र निर्देशकहरू सामेल छन् ।

अल्टम्यानलाई निष्काशन गरिएको केही समयमै ओपनएआईका अध्यक्ष तथा सहसंस्थापक ग्रेग ब्रोकम्यानले पनि कम्पनीसँगको आफ्नो जिम्मेवारीबाट अलग भएको घोषणा गरेका छन् ।