बंगलादेशको निर्यातमा कोरोना महामारीको असर

ढाका ।
दक्षिण एसियाली देश बंगलादेशको निर्यातबाट हुने आम्दानीमा कोरोनाको असर देखिएको छ । स्थानीय मिडियाहरुका अनुसार यस्तो आम्दानीमा ३.९२ प्रतिशतको गिरावट देखिएको हो ।

वर्षगत तुलनामा उक्त दरले आम्दानी घटेर तीन अर्ब १९ करोड अमेरिकी डलरमा झरेको छ । वस्तुहरुको शिपमेन्नट घटेपछि निर्यातमा असर परेको हो । कोरोना महामारीपछि सबैजसो क्षेत्र ठप्पप्रायः भएका थिए । डेलीस्टार अनलाइनका अनुसार फेब्रुअरीमा किनबेच गरिने वस्तुहरुको शिपमेन्ट ४.८३ प्रतिशतभन्दा तल रहेको थियो । उक्त महिनामा तीन अर्ब ३५ करोड डलरको निर्यात लक्ष्य राखिएको थियो ।

बंगलादेशको निर्यात प्रवर्द्धन ब्युरो (ईपीबी)का अनुसार गार्मेन्ट शिपमेन्टमा अझै सुधार भएको छैन । मुख्य निर्यात गन्तव्य मुलुकहरु अमेरिका र युरोपमा अहिले पनि कोरोनाको दोस्रो लहर कायमै हुँदा यी वस्तु निर्यातमा अहिले पनि असर देखिएको छ । तर बुनाउ वस्तुहरुको शिपमेन्टमा भने सुधार आएको छ ।

चालू आर्थिक वर्षको जुलाई र फेब्रुअरी अवधिमा गार्मेन्ट शिपमेन्ट ३.७३ प्रतिशतले घटेर २१ अर्ब तीन करोड डलरमा झरेको छ । उक्त अवधिमा बुनाउ वस्तु निर्यात ११ अर्ब ३४ करोड डलरको भएको थियो । यो भनेको ४.०६ प्रतिशतको वृद्धि हो । तर वोभन आइटम शिपमेन्ट भने ११.४९ प्रतिशतले घटेर आठ महिनामा नौ अर्ब ६९ करोड डलरमा झरेको छ । गार्मेन्ट निर्यात फेब्रुअरी महिनामा ७.७१ प्रतिशतले नकारात्मक रहेको छ भने बुनाउ वस्तुको निर्यातचाहिँ ५.७८ प्रतिशतले बढेको छ । त्यस्तै वोभन निर्यात १५.४७ प्रतिशतले ऋणात्मक छ ।

लेदर र यससम्बन्धी वस्तु शिपमेन्ट पनि ४.१५ प्रतिशतले घटेर ६० करोड ५६ लाख डलरको भएको छ । त्यस्तै फ्रोजन र जिउँदा माछा निर्यात १०.२८ प्रतिशतले घटेर ३३ करोड ८० लाख डलरको, फुटवेयर शून्य दशमलव २९ प्रतिशतले घटेर २१ करोड ८८ लाख डलरले र कच्चा जुट ५.९६ प्रतिशतले घटेर १० करोड ६३ लाख डलरमा झरेको छ ।

कृषि उत्पादन, विशेष टेक्सटाइल, फलफूल, सेरामिक, प्लाष्टिक, गंगटा, फर्निचर, कागजलगायतका वस्तुको निर्यात आम्दानी पनि घटेको बताइएको छ । यसका बाबजुद जुट, होम टेक्सटाइल, लेदर फुटवेयर, केमिकल वस्तु निर्यातबाट हुने आम्दानी भने बढेको बताइएको छ । यसबाहेक साइकल, ड्राइफुड, रबर, चिया, हलुका इन्जिनियरिङ वस्तु, औषधि, विद्युतीय सामान, कार्पेट र हेन्डिक्राफ्टतर्फको निर्यात आम्दानी पनि बढेको छ ।