कच्चा तेलको मूल्य घट्यो इरान–अमेरिका युद्ध ट-यो

लन्डन, पुस २४
इराकमा रहेका दुई अमेरिकी सैन्य आधारशिविरमा इरानले क्षेप्यास्त्र प्रहार गरेपछि एक्कासि बढेको कच्चा तेलको मूल्यमा पुनः गिरावट आएको छ । अमेरिकाले तत्कालै प्रत्याक्रमणको संकेत नदेखाएपछि तेलको मूल्यमा गिरावट आएको अन्तर्राष्ट्रिय मिडियाले जनाएका छन् । अमेरिकी कच्चा तेल बुधबार १.५ प्रतिशतले घटेर ६१.७५ अमेरिकी डलर प्रतिब्यारेल कायम भएको सीएनएनले जनाएको छ । मंगलबार अबेरसम्म उक्त तेल ६५.६५ डलर प्रतिब्यारेलसम्म पुगेको थियो । त्यस्तै, ब्रेन्ट क्रुड पनि शून्य दशमलव ८ प्रतिशतले घटेर प्रतिब्यारेल ६७.७० डलरमा झरेको छ । यसअघि उक्त तेल ७१.७५ डलरसम्म पुगेको थियो ।

संयुक्त अरब इमिरेट्सका ऊर्जामन्त्री सुहाइल अल मझरोईका अनुसार तेल उत्पादक राष्ट्रको समूह ओपेकले मध्यपूर्वको विवादलाई सम्बोधन गर्नेछ । ओपेकले तेल आपूर्ति नरोकिने जनाएको छ । यसैबीच बुधबार राति अमेरिकी राष्ट्रपति डोनाल्ड ट्रम्पले सम्बोधन गर्दै आफू शान्तिको पक्षमा रहेको बताएका छन्। ह्वाइटहाउसमा सम्बोधन गर्दै उनले इरान पछि हटेको बताए। योसँगै इरान– अमेरिका युद्ध टरेको छ।