साउदी अराम्कोको नाफा ४५ प्रतिशतले घट्यो

रियाद् ।
ठूलोमध्येको एक कच्चा तेल कम्पनी साउदी अराम्कोले गत वर्ष लकडाउनसँगै तेलको मागमा आाएको कमीले कम्पनीको नाफा ह्वात्तै घटेको बताएको छ । सन् २०२० मा कम्पनीको नाफा सन् २०१९ को तुलनामा करिब ४५ प्रतिशतले घटेको जानकारी दिएको हो ।

तर यसका बाबजुद पनि कम्पनीले घाटा भने व्यहोर्नु नपरेको देखिएको छ । कम्पनीले गत वर्ष ४९ अर्ब अमेरिकी डलरको नाफा आर्जन गरेको विवरण सार्वजनिक गरेको बीबीसीले जनाएको छ । महामारीले अँचेटे पनि कम्पनीका सेयरधनीले भने ७५ अर्ब अमेरिकी डलर बोनस पाउने भएका छन् । अराम्कोको ठूलो सेयर स्वामित्व भने साउदी सरकारसँग छ । कम्पनीका अनुसार गत वर्ष ठूलो चुनौतीपूर्ण वर्ष थियो । गत वर्ष साउदी अरेबियाले पनि अन्य देशले जस्तै उद्योगधन्दा बन्द गरेर धेरैजसो दैनिक क्रियाकलापमा कडाइ गरेको थियो । यसले ऊर्जा र इन्धनको माग समेत घटेको थियो ।

अन्य ठूला तेल र ग्यास कम्पनीहरु रोयल डच शेल र बीपीको पनि नाफा घटेको छ । यता अमेरिकी ऊर्जा कम्पनी एक्सोन मोबिलले पनि पहिलोपटक वार्षिक घाटा व्यहोर्नुपरेको छ  । डिसेम्बरयता भने कच्चा तेलको मूल्य पुनः पहिलेकै अवस्थामा फर्किनथालेको थियो । कोरोनाको खोप लगाउन सुरु भएयता कच्चा तेल ब्रेन्टको मूल्य प्रतिब्यारेल ६४.५३ अमेरिकी डलरमा आइपुगेको छ ।

अराम्कोका प्रमुख कार्यकारी अमिन नासिरका अनुसार एसियामा कच्चा तेलको माग पुनः बढ्नथालेको छ भने अन्यत्र पनि सकारात्मक संकेत देखिनथालेका छन् । विश्वका सरकारहरुले अर्थतन्त्र पुनः सञ्चालन गर्दा माग अझै बढ्ने उनको भनाइ छ ।