इन्डोनेसियाले १० लाख नरिवलको बिरुवा रोप्ने

जकार्ता । इन्डोनेसियाले देशमा १० लाख नरिवलको बिरुवा रोप्ने योजना बनाएको छ । राष्ट्रपति जोको विडोडोलेको बिहीबार भएको मध्य जाभा प्रान्तको भ्रमणको क्रममा सो कुरा सार्वजनिक भएको हो ।

जोकोवीको नामले चिनिने राष्ट्रपतिले त्यहाँका दुईवटा गाउँको भ्रमण गर्ने क्रममा स्थानीय अधिकारीहरूसँग नरिवलका बिरुवा रोपेको बताइएको छ । राष्ट्रपति जोकोवीले अहिलेसम्म त्यस प्रान्तमा करिब दुई लाख नरिवलका रूखहरू रोपिएको बताएका छन् । ‘अहिले यो सुरु मात्र गरेका छौँ करिब १० लाख नरिवलका बिरुवा रोप्ने लक्ष्य छ’, उनले भर्चुअल पत्रकार सम्मेलनमा सो कुरा उल्लेख गरेका हुन् ।

नरिवलको रुखले एक वर्षमा एक सय ८० वटा फल फलाउन सक्ने र पाम सुगर र खाना पकाउने तेलमा प्रशोधन गर्न सकिने बताइएको छ । साथै यसबाट स्थानीयको आम्दानीमा वृद्धि हुनेछ ।