सन् २०२२ मा मध्य भूमध्यसागरीय मार्गमा ५२५ आप्रवासीको मृत्यु

ट्रिपोली । सन् २०२२ मा कुल २४ हजार छ सय ८४ आप्रवासीलाई उद्धार गरी लिबिया फर्काइएको र लिबियाको तटीय क्षेत्र, मध्य भूमध्यसागरीय मार्गमा पाँच सय २५ आप्रवासीको मृत्यु भएको छ । उक्त अवधिमा आठ ४८ जना बेपत्ता भएको आईओएमले जनाएको छ ।

सिन्ह्वाका अनुसार अन्तर्राष्ट्रिय आप्रवासन संगठन (आईओएम) ले गत साता एक हजार ८८ आप्रवासीलाई उद्धार गरी लिबियातर्फ फर्काइएको जनाएको छ । ‘सन् २०२२ को डिसेम्बर २५ देखि ३१ सम्मको अवधिमा एक हजार ८८ आप्रवासीलाई रोकेर लिबिया फर्काइएको छ’, आईओएमले बुधबार जारी गरेको विज्ञप्तिमा भनिएको छ ।

उद्धार गरिएका आप्रवासीमा एक हजार दुई सय ४१ महिला र सात सय ७६ बालबालिका रहेका छन् । सन् २०११ मा दिवङ्गत नेता मुअम्मर गद्दाफीको शासनको पतनपछि देशमा असुरक्षा र अराजकताका कारण धेरै आप्रवासीहरू, अधिकांश अफ्रिकीहरूले भूमध्यसागर पार गरेर लिबियाबाट युरोपेली किनारातिर जाने गरेका छन् ।