कृष्ण दवाडी
कास्की, जेठ १५
कोभिड–१९ को संक्रमण रोक्न देशव्यापी जारी बन्दाबन्दीले पोखरामा निर्माणाधीन देशकै दोस्रो ठूलो खानेपानी सुुदृढीकरण आयोजनाको काम रोकिएको छ । जापान सरकारको अनुदान सहयोग र नेपाल सरकारको ऋण लगानीमा पाँच अर्ब लागतमा पोखरामा लगानीका हिसाबले मेलम्चीपछिको दोस्रो ठूलो खानेपानी आयोजना सुदृढीकरणको काम धमाधम भइरहेकामा बन्दाबन्दीपछि आयोजनाको सम्पूर्ण काम ठप्प भएको हो ।
खानेपानी संस्थानबाट सञ्चालित र जापानी अन्तर्राष्ट्रिय सहयोग नियोग (जाइका)अन्तर्गत निर्माण भइरहेको सो परियोजनाबाट हाल पोखरामा खानेपानी आपूर्ति भइरहेको मर्दीखोलाको पानी प्रशोधन गर्ने तथा थप वितरणलाइन निर्माणको योजना छ । हाल अप्रशोधित पानी उपलब्ध भइरहेकामा सो आयोजना सम्पन्न भएपछि यसले समेटेको क्षेत्रमा चौबीसै घण्टा राष्ट्रिय खानेपानी गुणस्तरअनुसारको प्रशोधित पानी उपलब्ध हुने खानेपानी संस्थानले जनाएको छ । सो आयोजनाको गत वर्ष जेठमा संघीय सरकारका खानेपानीमन्त्री बिना मगरले पोखरा–१९ पुरुनचौरमा शिलान्यास गरेपछि कामले तीव्रता पाएको थियो । आयोजनाको निर्माणकार्य जापानी निर्माण कम्पनीले नै अघि बढाएको हो । खानेपानी संस्थानका इञ्जिनियर सन्तोषकुमार दासले लकडाउन आह्वानपछि निर्माणमा परिचालित सबै मजदुर घर फर्किएको र काम ठप्प भएको बताए । हालसम्म समग्रमा २४ प्रतिशत कार्य प्रगति भए पनि लकडाउनले गर्दा निर्धारित मितिभित्रमै आयोजना सम्पन्न गर्न बाधा पु-याएको उनको भनाइ छ ।
‘यसअघि हाम्रो लक्ष्यभन्दा पनि माथि काम भए पनि दुई महिनायता आयोजनाको सबै काम रोकिएको छ । लकडाउन नखुलेसम्म काम सुरु हुने अवस्था छैन । यसबाट हाम्रो लक्ष्य घट्ने भयो’, इन्जिनियर दासले भने । प्रशोधन केन्द्र र पाइपलाइन विस्तार गरी दुई खण्डमा आयोजनाको काम अघि बढेको थियो । उनका अनुसार पोखराबासीले पिउने पानीको प्रमुख स्रोत रहेको मर्दीखोलाको पानी शुद्धीकरणका लागि मुहाननजिक दैनिक चार करोड लिटर क्षमताका बालुवा हटाउने ट्यांकी निर्माण गरिनेछ । मुहान नजिक ग्रिड च्याम्बर र पानी थिग्र्यउने (सेडिमेन्टेसन ट्यांक)को काम सुरु भएलगत्तै काम रोकिएकाले यसमा खासै प्रगति हुन नसकेको बताइन्छ ।
ग्रिड च्याम्बरबाट शुद्धीकरण गरिएको पानीलाई पुरुनचौरमा थप शुद्धीकरणका र प्रशोधन गरिनेछ । चार करोड लिटरकै चार पानी थिग्र्याउने ट्यांकी तथा पानी छान्ने फिल्टर, दुई सफा पानी संकलन गर्ने ट्यांकी (स्लोस स्याण्ड फिल्टर) र क्लोरिनेसन प्लान्ट निर्माणको काम भइरहेको छ । स्लोस एण्ड फिल्टरको ६० प्रतिशत काम सम्पन्न भएको इन्जिनियर दासले जानकारी दिए । पोखरामा हाल आपूर्ति भइरहेको पानी विना प्रशोधन उपभोक्ताको घरसम्म पुग्ने गरेकामा आयोजना सम्पन्न भएपछि धारामा शुद्ध पिउने पानी आपूर्ति हुनेछ । वर्षायाममा नदीमा बाढी आउँदा पोखरामा आउने पानीसमेत दूषित हुने गरेको छ ।
बजारमा आपूर्ति हुने खानेपानी भण्डारण गर्न २० लाख लिटर क्षमता तीन पानीट्यांकी पोखराको फूलबारी, प्रस्याङ र कोलपाटनमा निर्माण गरी त्यसमार्फत बजारका विभिन्न भागमा वितरण गर्ने योजनाअनुसार काम भइरहेको छ । फूलबारीमा निर्माण गर्न लागिएको अन्डरग्राउन्ड ट्यांकीको हालसम्म ८० प्रतिशत तथा कोलपाटनको ओभरहेड ट्यांकीको २० प्रतिशत काम सकिएको छ । प्रस्याङमा फाउन्डेसनको काम सुरु भएसँगै रोकिएको थियो । बजारमा कुल ९६ किमि पाइपलाइन विस्तार योजनाअन्तर्गत एक वर्षको अवधिमा १४ किमि पाइप जडान गरिसकिएको बताइन्छ ।
जापान सरकारको चार अर्ब ८१ करोड ३० लाख रुपैयाँ अनुदान सहयोगमा सन् २०१७ को फेब्रुअरी १५ मा सो आयोजनासम्बन्धी सम्झौता भएको थियो । सन् २०२२ को अन्त्यसम्ममा निर्माण गरिसक्ने गरी खानेपानी सुधार आयोजना अघि बढेको हो । आयोजना निर्माणपछि पाइपलाइनमा पानीको चापमा सुधार भई पानी चुहावट नियन्त्रण भई आपूर्तिमा सुधार भएर महानगरको १ देखि १९ वडाका चार लाख पाँच हजार ८ सय ८९ जनसंख्या लाभान्वित हुने अपेक्षा गरिएको छ । संस्थानका अनुसार पोखरामा चौबीसै घण्टा सहज आपूर्तिका लागि दैनिक छ करोड ५० लाख लिटर पानी आवश्यक पर्ने गरेकामा हाल चार करोड हाराहारीमा मात्र आपूर्ति हुने गरेको छ ।
क्याटेगोरी : बिबिध
ताजा अपडेट
- भारतद्वारा इरान बन्दरगाह सम्झौतामा अमेरिकी प्रतिबन्धको धम्की अस्वीकार
- एनसेलको ‘सधैं अन’ नामक आकर्षक योजना
- द नेपाल डिस्टिलरिजद्वारा बालाजु क्षेत्रमा पोल र सडक बत्ती जडान
- माछापुच्छ्रे बैंकद्वारा दुर्घटना बीमाको रकम हस्तान्तरण
- ग्लोबल आइएमई बैंकलाई ‘बेस्ट बैंक अवार्ड’
- शुन्य दशमलव ७९ अंकले उक्लियो सेयर बजार
- सुदूरपश्चिमका मुख्यमन्त्री सोडारीले प्राप्त गरे विश्वासको मत
- एकीकृत समाजवादीद्वारा श्रम आयोग गठनको माग
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- चिया पसल पनि कम्पनी ?
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया