पशु चिकित्सालयमा चोरलाई चौतारी साधुलाई शूली

काठमाडौं, जेठ १९
सरकारी छाप, सरकारी लेटर प्याड, सरकारी अधिकारीको दस्तखत, सरकारी चिठ्ठी र सरकारी चलानी, नम्बरसमेत नक्कली, कीर्ते र जालसाजी गरेको आफैंले कबुल गरेको एक जना पशु औषधि र आहार सप्लाई गर्ने कम्पनीका सञ्चालकलाई प्रहरीले सफल अनुसन्धानपछि कारबाही अघि नबढाई रहस्यमय ढंगले स्थगन गरेको पाइएको छ । केन्द्रीय पशु चिकित्सालय त्रिपुरेश्वरका लागि आवश्यक औषधि खरिदको सम्बन्धमा मुनाल बायोमेट फर्माका सञ्चालक रेवतिरमण निरौलाले त्यसरी कीर्ते र जालसाजी गरेका थिए ।

पशु औषधि सप्लायर निरौलाले केन्द्रीय पशुचिकित्सालयले स्वास्थ्य सेवा विभागलाई सिफारिस गरेको औषधि खरिद गर्ने प्रस्तावलाई जालसाजी गरी वीरगञ्ज भन्सार कार्यालयलाई सम्बोधन गरी लेखिएको पत्रमा हस्ताक्षर गराएका थिए । त्यतिबेला वीरगञ्ज भन्सार कार्यालय र स्वास्थ्य सेवा विभागबीच विवाद रहेको बुझिएको छ र त्यही कारण औषधि सप्लायर निरौलाले जालसाजी गरी पशुचिकित्सालयको पत्र सोझै वीरगञ्ज भन्सार कार्यालयमा पठाएका थिए ।

निरौलाले त्यसरी जालसाजी गरी वीरगञ्ज भन्सार कार्यालयमा केन्द्रीय पशुचिकित्सालयको नाममा पत्र पठाएको थाहा पाएलगत्तै त्यसका प्रमुख डा. वलराम थापाले त्यसविरुद्ध कारबाही अघि बढाएका थिए र कारबाहीका लागि पशु स्वास्थ्य निर्देशनालय, औषधि व्यवस्था विभागलगायत आठ ठाउँमा कारबाहीका लागि निवेदन दिएका थिए । तर उनको उजुरी र सिफारिसमाथि कहीँ कतै पनि कारबाही चालेको थाहा हुनसकेको छैन । २०६७ सालमा अस्पताललाई आवश्यक औषधि किन्न सिफारिस गर्दा निरौलाले जालसाजी गरेर उक्त पत्र वीरगञ्ज भन्सारलाई सम्बोधन गरेर औषधि छुटाउने पत्र लेखेका थिए । २०६९ सालमा औषधिको सीमित सिफारिसमा आफूखुसी नाम थपेर सिफारिस गरेको र वीरगञ्ज भन्सारबाट औषधि छुटाउन सिफारिस गरेका थिए । त्यस सम्बन्धमा कार्यालय प्रमुख डा. बलराम थापाले कारबाही गर्न पत्राचार गर्नुको साथै कारबाहीका लागि पशुसेवा विभागलगायत आठ ठाउँमा उजुरी गरेपछि प्रहरीको छानबिनको दायरामा परेको थियो ।

औषधि सप्लायर निरौलाले नक्कली चिठी लेखेका थिए । सरकारी कार्यालयले त्यसरी सादा कागजमा आफ्नो सिफारिस लेखेर पठाउने प्रचलन नै छैन । सरकारी कार्यालयको आफ्नै लेटर प्याड हुन्छ र जतिसुकै पानाको सिफारिस भए पनि लेटर प्याडमै लेखिएको हुन्छ तर सादा कागजमा सिफारिस गरेर पठाउने प्रचलन छैन । तर निरौलाले सिफारिसको पहिलो पाना केन्द्रीय पशु चिकित्सालयको लेटर प्याडमा छ र दोस्रो पाना सादा कागजमा छ । सरकारी सिफारिस त्यस्तो हुँदैन ।

२०६९ माघ ८ को उक्त पत्रको चलानी नम्बर १८२ रहेको छ । केन्द्रीय पशु चिकित्सालयको १८२ को चलानी नम्बरमा भन्सार कार्यालय वीरगञ्जलाई लेखेको पत्र छैन । चिकित्सालयको १८२ नम्बरको चलानीमा राष्ट्रिय वाणिज्य बैंक टेकुलाई रकम जम्मा गरिदिनेबारे लेखिएको पत्र छ । लेटरप्याडविनाको सादा कागजमा सरकारी छाप र कार्यालय प्रमुखको हस्ताक्षर स्क्यान गरेर पेस्ट गरेजस्तै गरी चलानी नम्बरमा पनि निरौलाले कीर्ते गरेको स्पष्ट रुपमा देखिएको छ । सादा कागजमा गरिएको औषधिको सिफारिसको सूचीमुनि वरिष्ठ पशुचिकित्सक डा. बलराम थापाको हस्ताक्षर स्क्यान गरी पेस्ट गरेको जो कसैले सजिलै छुट्याउन सक्दछ । नक्कली पत्रमा सरकारी छाप लगाइएको छ । त्यतिबेला केन्द्रीय पशु चिकित्सालय कृषि तथा सहकारी मन्त्रालयअन्तर्गत थियो तर पत्रमा छापचाहिँ कृषि विकास मन्त्रालयको लागेको छ ।

निरौलाले विगत लामो समयदेखि यस्तै धन्दा गर्दै आएका छन् । उनी २०४५ सालअघि भारतीय मेरिण्ड कम्पनीको प्रतिनिधि भएर काम गर्थे र त्यसपछि उनले मुनाल बायोभेट फर्मा खोलेर पशुपन्छीको औषधि सप्लाई गर्दै आएका छन् । अहिले उनी इण्डिया, इन्डोनेसियालगायतका थुप्रै देशका कम्पनीको प्रतिनिधिका रुपमा औषधि बिक्री गर्दै आएका छन् । ती कम्पनीका सबै उत्पादनलाई औषधि व्यवस्था विभागले नेपाल ल्याउन पाउने सूचीमा सूचीकृत गरेको हुँदैन र सूचीकृत नभएका औषधि नेपाल ल्याउन पाइँदैन ।

त्यस्ता प्रतिबन्धित औषधि जालसाजी र कीर्ते गरेर नेपाल छिराउने र एकलौटी रुपमा मनपरी मूल्यमा बिक्री गर्ने उनको ध्येय रहेको हुनुपर्दछ र त्यही कारण निरौलाले त्यसरी नक्कली पत्र, कीर्ते छाप, चलानी नम्बर कीर्ते हस्ताक्षर गरेर औषधि छुटाउन वीरगञ्ज भन्सार कार्यालयलाई पत्र पठाएका हुन् । उनले त्यसरी कीर्तेकाइते गरी नक्कली पत्र पठाउँदा डा. थापा कार्यालयमा थिएनन् र उनी एउटा तालिममा रहेका थिए । तालिमबाट फर्किएपछि निरौलाको बेइमानी थाहा पाएर उनले तत्काल कारबाहीका लागि पशु सेवा विभाग, औषधि व्यवस्था विभाग, पशु स्वास्थ्य निर्देशनालय, भन्सार विभागलगायत आठ निकायमा सिफारिस पनि गरेका छन् । तर ती निकायले कारबाही नगरे पनि प्रहरीले चाहिँ उनलाई हिरासतमा लिएर छानबिन गरेको थियो ।

महानगरीय प्रहरी अपराध महाशाखाका प्रहरी नायब निरीक्षक भोला शंकर गिरीले २०७० असोज ३ गते छानबिन प्रतिवेदन महानगरीय प्रहरी अपराध महाशाखा हनुमान ढोकामा बुझाएका छन् । उक्त छानबिनले निरौलाले नै कीर्ते गरेको निष्कर्ष निकालेको छ र स्वयम् निरौलाले २०६९ चैत १४ गते केन्द्रीय पशु चिकित्सालयका प्रमुखलाई लेखेको पत्रमा सो पत्र आफूलाई आएको च.नं. १८१ मा उल्लेख भएअनुसारको क्रियाकलापहरु (कीर्ते र जालसाजी) भूलवश हुन गएको र यस फर्मा (मुनाल बायोभेट फर्मा)ले आगामी दिनमा त्यस्ता क्रियाकलाप नगर्ने प्रतिबद्धता जनाउँछु भनी रेवतीरमण निरौलाले उल्लेख गरेका छन् र उनीले आपूmले ती सबै गल्ती गरेको स्वीकारिसकेपछि पनि उनीमाथिको कारबाही रोकिनु र निरौलाले जालसाजी र सरकारी छाप, लेटरप्याड पत्र कीर्ते गरेको भनी कारबाही गर्न उजुरी गर्ने डाक्टर थापामाथि नै कारबाही गर्ने प्रक्रिया अघि बढाइनुले चोरलाई चौतारो, साधुलाई शूली भन्ने नेपाली उखान चरितार्थ हुन पुगेको छ ।