एनसेल भोल्टे सेवा आइफोनमा पनि

काठमाडौं । आइफोन प्रयोग गर्ने एनसेलका ग्राहकहरूले स्पष्ट सुनिने हाइ डेफिनिसन (एचडी) भ्वाइस कल सेवाबाट फाइदा लिन सक्ने भएका छन् । एन्ड्रोइड प्लेटफर्ममा आफ्नो भ्वाइस ओभर लङ टर्म इभोलुसन (भोल्टे) सेवा ‘एनसेल भोल्टे’ सञ्चालन गरेपछि एनसेलले अब नयाँ वर्षको सुरुवातसँगै आईओएस प्लेटफर्ममा पनि यो सेवा ल्याएको छ ।

दूरसञ्चार सेवाका क्षेत्रमा भोल्टे एक नयाँ प्रविधि हो, जसले एचडी र छिटो कनेक्ट हुने भ्वाइस कल सेवा प्रदान गर्दछ । भोल्टेमा फोरजी नेटवर्क प्रयोग गरी गुणस्तरीय भ्वाइस कल गर्न सकिन्छ । ग्राहकले अब फोरजी नेटवर्कमा रही फोन गर्दा सामान्य कल शुल्कमा नै उच्च गुणस्तरको भ्वाइस कलका साथै डेटा सेवाको एकै साथ फाइदा लिन सक्छन् ।

एनसेल भोल्टे सेवा लिने आइफोन प्रयोगकर्ताहरूले २८ दिनको लागि मान्य रहने एक सय मिनेट अन–नेट भोल्टे टक टाइम पाउनेछन् । आइफोन ८ र त्यसपछिका आइफोन सिरिज प्रयोग गरिरहेका एनसेलका ग्राहकहरूले भोल्टे सेवा लिन र एक सय मिनेट बोनस टक टाइमका लागि योग्य हुन्छन् । यसरी योग्य भएका ग्राहकले एस्ट्रिक्स १७२०१ ह्यास् डायल गरी भोल्टे सेवा लिन र यसमा पाइने बोनस प्राप्त गर्न सक्छन् ।

भोल्टेका साथै एनसेलले आफ्नो नेटवर्कमा आइफोन प्रयोग गर्ने ग्राहकहरूका लागि एउटा अर्को पनि योजना ल्याएको छ । यसअन्तर्गत आफ्नो भौतिक सिमलाई ई–सिममा अपग्रेड गर्ने ग्राहकले सात दिनसम्म प्रयोग गर्नसक्ने दुई जीबी बोनस डेटा पाउँछन् । बोनस डेटा नेपालमा नै अवस्थित आइफोनको आधिकारिक बिक्रेतामार्फत आइफोन खरिद गरेका ग्राहकहरूका लागि लागू हुनेछ ।

आइफोन प्रयोगकर्ताले १७१२५ डायल गरी आफ्नो सिमलाई ई–सिममा अपग्रेड गर्न सक्छन् । यसका लागि ग्राहकले आफ्नो नागरिकता नम्बर, इमेल ठेगाना टाइप गरी १७१२५ मा एसएमएस पठाउनु पर्दछ । ई–सिम सुचारु गर्नुभन्दा पहिला ग्राहकले एनसेलको प्रतिनिधिबाट ग्राहक पहिचानका लागि कल प्राप्त गर्दछन् । यो एसएमएस पठाउन र सिम अपग्रेड गर्नका लागि कुनै शुल्क लाग्ने छैन । अन्य ग्राहकले आफ्नो नजिकैको एनसेलबाट नयाँ ई–सिम निःशुल्क लिन सक्छन् ।

एनसेलको फोरजी नेटवर्क उपलब्ध रहेका नेपालभरका सबै एनसेल ग्राहकले भोल्टे सेवाको फाइदा लिन सक्छन् । ग्राहकले यो सेवाबाट लाभ लिन आफ्नो भोल्टे चलाउन योग्य मोबाइल सेटमा फोरजी सेटिङ अन गर्नुपर्ने हुन्छ र फोरजी नेटवर्कमा रहेको हुनुपर्दछ ।