विदेशी मुद्रा सञ्चितिमा दबाबपछि सरकारी अधिकारीलाई विदेश जान रोक

ढाका । बंगलादेशमा पनि विदेशी मुद्रा सञ्चितिको दबाब देखिनथालेको छ । त्यहाँको सरकारले उक्त दबाब थेग्न सरकारी अधिकारीलाई विदेश भ्रमणमा रोक लगाएको डेलीस्टार अनलाइनले जनाएको छ ।

यसबाहेक कम महत्वका परियोजना र त्यसका लागि आवश्यक वस्तु आयात पनि तत्कालन नगर्ने निर्णय गरेको बंगलादेशी सरकारका अर्थमन्त्री मुस्ताफा कमलले बताए । अहिले दक्षिण एसियाका अधिकांश देशमा विदेशी मुद्रा सञ्चिति घट्दै गइरहेको छ । यसैबीच, बंगलादेशको केन्द्रीय बैंकले कुनै पनि बैंक नोट रद्द नगरेको जनाएको छ । बैंक नोट बन्दीको हल्ला फैलिएपछि बुधबार सूचना जारी गर्दै उक्त जानकारी गराएको हो ।

सामाजिक सञ्जालमा बंगलादेश बैंकले रातो रंगका एक हजार दरका बैंक नोट नचल्ने बनाएको भन्दै एउटा सूचना भाइरल भएपछि केन्द्रीय बैंकले उक्त सूचना झूटो रहेको स्पष्ट पारेको बताइएको छ ।