हराएका दुईपाङ्ग्रे सवारी धनीलाई हस्तान्तरण

काठमाडौ । काठमाडौंं उपत्यका ट्राफिक प्रहरी कार्यालयले विभिन्न मितिमा हराएका २१ वटा दुई पाङ्ग्रे सवारी खोजी गरी सम्बन्धित धनीलाई हस्तान्तरण गरेको छ । रामशाहपथस्थित काठमाडौं उपत्यका ट्राफिक प्रहरी कार्यालयमा आइतबार एक कार्यक्रमका बीच प्रहरी उपरीक्षक सन्तोष आचार्यले सवारी हस्तान्तरण गरेका हुन् ।

कार्यक्रममा उनले १६ वटा मोटरसाइकल र पाँच वटा स्कुटर धनीलाई सवारी हस्तान्तरण गरेको ट्राफिक महाशाखाले जनाएको छ । चालू आर्थिक वर्षमा ६९ वटा सवारी यसअघि नै धनीलाई जिम्मा लगाइसकेको प्रहरी उपरीक्षक आचार्यले बताए । यस्तै, चालू आवमा नै दुईवटा चोरीका मोटरसाइकलसहित तीन जनालाई ट्राफिक प्रहरीले नियन्त्रणमा लिएर आवश्यक अनुसन्धान तथा कारबाहीका लागि विभिन्न प्रहरी कार्यालय पठाएको समेत जनाएको छ । सवारी चोरी हुन तथा हराउनबाट जोगिने आफ्नो सवारी सुरक्षित स्थानमा पार्किङ गर्ने, ह्विल लक, चेन लक, ह्यान्डिल लक, डिस्क लकलगायत सुरक्षा साइरनहरू जडान गर्नुका साथै मानिसको आवतजावत नहुने एकान्त स्थानमा पार्किङ नगर्न काठमाडौं उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्रप्रसाद भट्टले आग्रह गरेका छन् । सवारी साधन हराएमा ट्राफिक प्रहरीको हटलाइन नम्बर १०३, नेपाल प्रहरीको हटलाइन नम्बर १०० मा फोन गर्न र नजिकको प्रहरी कार्यालयमा निवेदन दिन सकिने भट्टको भनाइ छ ।