Techie IT
×
गृहपृष्ठसमाचारनरैनापुरका किसानलाई विशेष राहत प्याकेजका लागि पहल गर्ने

नरैनापुरका किसानलाई विशेष राहत प्याकेजका लागि पहल गर्ने


काठमाडौं । युवा तथा खेलकुद मन्त्री महेश्वर गहतराज अथकले बाँकेको सुख्खा क्षेत्र नरैनापुरका किसानहरूका लागि विशेष राहत प्याकेज उपलब्ध गराउन पहल गर्ने प्रतिबद्धता जनाएका छन् । लामो समयदेखि वर्षा हुन नसक्दा खडेरीको सामना गरिरहेको नरैनापुर क्षेत्रको सोमबार स्थलगत निरीक्षण गर्दै उनले समस्या समाधानका लागि केन्द्रीय स्तरबाटै पहल गर्ने प्रतिबद्धता जनाएका हुन् ।

यस्तै उनले किसानहरूलाई भोकमरीबाट जोगाउन तीनै तहका सरकारले विशेष ध्यान दिनुपर्ने बताए । लामो समयदेखि पानी नपरेपछि धान बीउ सुकेर पराल भइसकेकाले नरैनापुरमा भोकमरीको त्रास बढेको छ । भदौको दोस्रो सातासम्म पनि पानी नपरेपछि नरैनापुरका किसानहरूको यो वर्षको खेतीको आश मारिसकेका छन् ।

अन्य क्षेत्रमा खेती लगाइसक्दा समेत आफूहरूले धान रोप्न नपाएको भन्दै नरैनापुरका किसानहरूले दुःख व्यक्त गरेका छन् । पानी पर्ला र छिटो खेती गरौँला भन्ने आशैआशमा बसेका कृषकहरूले तयार पारेको बीउ समेत सुकेर पराल बनेको छ ।

सिँचाइको सुविधा नभएकाले आकासेपानीको भरमा बसेका नरैनापुरका किसानहरू पानीविनाको माछाजस्तै बनेका छन् ।नरैनापुर गाउँपालिका अध्यक्ष ईस्तियाक अहमद शाहका अनुसार यो वर्ष नरैनापुरमा भोकमरी हुने संकेत देखिएको छ । कृषकहरूलाई भोकमरीबाट बचाउन केन्द्र सरकारकाबाट राहत उपलब्ध गराउन साहले आग्रह गरेका छन् ।

खडेरीबाट उत्पन्न हुनसक्ने परिस्थिति भयावह हुनसक्ने भन्दै अध्यक्ष शाहले केन्द्र र प्रदेश सरकारले राहत प्याकेज उपलब्ध गराउनुपर्ने बताए । नरैनापुरमा तीन हजार नौ सय ६६ हेक्टर जमिन रहेको छ ।

जसमध्ये १५ प्रतिशत जमिनमा मात्र रोपाइँ भएको र समयमै पानि नपर्दा रोपेको धान समेत सुकेको नरैनापुर कृषि शाखा प्रमुख सदन भण्डारीले जानकारी दिए । कृषि ज्ञान केन्द्र बाँकेका प्रमुख सागर ढकालका अनुसार नरैनापुरबाहेक बाँके जिल्लामा ९९ प्रतिशत रोपाइँ भइसकेको र नरैनापुरमा पानी नपर्दा रोपाइँ हुन नसकेको हो ।

रोपाइँको लागि तयार भएको बीउ सुकेर पराल भएको र पुनः बीउ राख्ने अवस्था नभएको कारण खेतीको आश मरिसकेको नरैनापुर ३ का किसान रामनरेश हरिजन बताउँछन् । सिक्टा सिँचाइ आयोजनाले नहर बनाउन ढिलो गरेकाले वर्षेबालीका लागि आकासेपानीको भर पर्नुपर्नेे भन्दै हरिजनले दुःख व्यक्त गरे ।


क्याटेगोरी : समाचार

तपाईको प्रतिक्रिया