एक महिनापछि जिल्ला अस्पताल फाप्लुमा अप्रेसन सुरु

सोलुखुम्बु । विशेषज्ञ चिकित्सक नहुँदा करिब एक महिनादेखि बन्द भएको अप्रेसन सेवा पुनः सुरु भएको छ । एमडीजीपी डाक्टर नहुँदा साउन १ गतेबाट ठप्प बनेको अप्रेसन सेवा करिब एक महिनापछि आजबाट सुरु भएको हो ।

जिल्ला अस्पतालमा मातृ तथा नवशिशु कार्यक्रम काठमाडौंले विशेषज्ञ डाक्टर सुरेन्द्र शाक्यलाई खटाएको अस्पतालका निमित्त प्रमुख सानी शेर्पाले जानकारी दिइन् । उनका अनुसार डा शाक्य सोमबार बेलुका अस्पतालमा आइपुगेसँगै मंगलबार २४ सै घण्टा अप्रेसन सेवा सुरु भएको हो । उनलाई एक वर्षको करार सम्झौता गरी मन्त्रालयले खटाएको अस्पतालले जनाएको छ । यसअघि करारको विशेषज्ञ डाक्टर अजय चौधरीको करार सम्झौता अवधि सकिएसँगै यही साउन १ गतेदेखि जिल्ला अस्पताल विशेषज्ञ डाक्टरविहीन भएको थियो । सोही कारण अस्पतालको अप्रेसन सेवा रोकिएको थियो । यद्यपि अस्पतालमा मेडिकल अधिकृत(बिरामी जाँच गर्ने) डाक्टर तीन जना रहेका थिए । उनीबाट उपचार सेवा नियमित प्रवाह भइरहेको अस्पताल निःप्रमुख शेर्पाले बताइन् ।

यससँगै जिल्ला अस्पतालमा कुल डाक्टरको संख्या चार पुगेको छ । अब गर्भवती, सुत्केरी तथा अन्य अप्रेसन गर्नुपर्ने बिरामीलाई अन्यत्र रेफर गर्नुपर्ने बाध्य हटेको फाप्लु अस्पतालले जनाएको छ । अस्पतालमा विशेषज्ञ चिकित्सक व्यवस्थापनका लागि सोलुदूधकुण्ड नगरपालिका, अस्पताल व्यवस्थापन समितिलगायतले सहयोग र समन्वय गरेको जनाइएको छ ।