रुसको अन्तरिक्षयान ‘लुना–२५’ चन्द्रमामा दुर्घटना

रुस । रुसको मानवरहित अन्तरिक्षयान ‘लुना–२५’ नियन्त्रणबाहिर गएपछि चन्द्रमामा दुर्घटनामा परेको अधिकारीहरूले बताएका छन् । सो अन्तरिक्षयानलाई चन्द्रमाको दक्षिणी ध्रुवमा अवतरण गराउने उद्देश्यसहित मस्कोले अन्तरिक्षयान प्रक्षेपण गरेको थियो ।

रुसले सन् १९७६ पछि चन्द्रमामा अन्तरिक्षयान पठाएको यो पहिलो थियो । सोमबारका लागि नियन्त्रित अवतरण तय गरिएको उक्त यान अवतरण गर्नुअघिको कक्षमा पुगेपछि समस्या देखिएको र सम्पर्क गुमाएको रुसी सरकारी अन्तरिक्ष निकाय रोसकोमोसले जनाएको छ ।

वैज्ञानिकहरूले चन्द्रमाको दक्षिणी क्षेत्रमा बरफ र महत्वपूर्ण तत्वहरू हुनसक्ने अनुमान गर्दै आएका छन् । अहिलेसम्म चन्द्रमाको दक्षिणी ध्रुवमा कुनै पनि देशले यान पठाउन सकेका छैनन् । पछिल्लो समय भारत र रुसबीच त्यस क्षेत्रमा चन्द्रयान पठाउने प्रतिस्पर्धा चलेको थियो । भारतले अर्को साता त्यस क्षेत्रमा चन्द्रयान–३ अवतरण गराउने प्रयासमा छ ।