सोनीले साढे तीन अर्ब डलरमा बन्जी किन्ने

टोक्यो । जापानी प्रविधि कम्पनी सोनीले भिडिओ गेम विकासकर्ता बन्जी खरिद गर्ने भएको छ । कम्पनीले तीन अर्ब ६० करोड अमेरिकी डलरमा उक्त खरिद गर्नलागेको हो । डेस्टिनी, हालो गेम्सका लागि प्रसिद्ध बन्जी खरिदले कम्पनीलाई फाइदा हुनेछ । हालो पनि त्यस्तो चर्चित खेल हो जसले माइक्रोसफ्टको एक्सबक्सको जनप्रियतामा योगदान गरेको थियो ।

यही महिनाको सुरुतिर माइक्रोसफ्टले पनि भिडिओ गेम कम्पनी एक्टिभिजन ब्लिजार्ड ६८ अर्ब ७० करोड डलरमा खरिद गर्ने योजना रहेको बताएको थियो । जुन हालसम्मकै कम्पनीको ठूलो खरिद सम्झौता हो ।

सोनी इन्टरएक्टिभ इन्टरटेन्मेन्टका अध्यक्ष तथा प्रमुख कार्यकारी जिम रयानले कम्पनीको रणनीतिको महत्वपूर्ण कदम भएको बताए । यसले प्लेस्टेसन पुग्न र धेरै ग्राहक पाउन महत्वपूर्ण साबित हुने उनको भनाइ छ । खरिद गरे पनि बन्जी स्वतन्त्र रुपमै रहने उनको भनाइ छ । सोनीले सम्झौताले कहिले अन्तिम रुप पाउने बताएको छैन ।